روس میں ایک ہولناک حادثے میں پولٹری فارم کی ورکر گوشت پیسنے والی مشین میں آگئی، اس کے ساتھی اس کی مدد کو دوڑے لیکن اس کے لیے کچھ نہ کرسکے۔
یہ لرزہ خیز واقعہ روس کے ایک چھوٹے سے قصبے میں پیش آیا جس کی سی سی ٹی وی فوٹیج بھی جاری کردی گئی ہے۔ فوٹیج ایک پولٹری فارم کی ہے جہاں ایک خاتون ورکر مرغی کا گوشت اٹھا کر ایک سے دوسرے کنویئر پر منتقل کر رہی ہیں۔
اس دوران اچانک ورکر کا ہاتھ مشین میں پھنس جاتا ہے اور وہ مشین میں کچلتی ہوئی آگے کی طرف چلی جاتی ہے۔
ورکر کی بھیانک چیخیں سن کر اس کے ساتھی بھاگ کر وہاں پہنچتے ہیں لیکن وہ اس کی کوئی مدد کرنے سے قاصر رہتے ہیں، میڈیکل رپورٹ کے مطابق ورکر موقع پر ہی جاں بحق ہوگئی تھی۔
واقعے کے بعد ایک تحقیقاتی کمیٹی قائم کی گئی جس نے اپنی رپورٹ میں حفاظتی اقدامات نہ ہونے کو حادثے کی وجہ قرار دیا۔ رپورٹ میں کہا گیا کہ گوشت پیسنے والی مشینوں کے ارد گرد کوئی حفاظتی شیلڈ نہیں تھی اور کوئی بھی شخص آسانی سے مشینوں کے نہایت قریب جاسکتا تھا۔
رپورٹ میں پولٹری فارم انتظامیہ کو حادثے کا ذمہ دار قرار دیا گیا جس کے بعد اب پولٹری فارم مالکان اور اس نجی کمپنی کے خلاف قانونی کارروائی کا امکان ہے جو فارم کو ملازمین فراہم کرتی تھی۔
