سری نگر: مقبوضہ کشمیر کی آئینی حیثیت تبدیل کرنے کے دو سال مکمل ہونے پر حریت رہنماؤں نے وادی میں ہڑتال اور احتجاج کی کال دی ہے۔
اے آر وائی نیوز کے مطابق مقبوضہ کشمیر کی آئینی حیثیت آرٹیکل 370 تبدیل کرنے کے غیر قانونی بھارتی اقدام کو آج پانچ اگست کو دو سال کا عرصہ مکمل ہوگیا۔
بھارتی حکومت کے غیر آئینی اقدام کے خلاف مقبوضہ وادی سمیت دنیا بھر میں آج یوم استحصال کشمیر منایا جائے گا، جس کے تحت مختلف پروگرامز کا انعقاد کیا جائے گا، جس میں کشمیریوں کے ساتھ اظہارِ یکجہتی اور خصوصی حیثیت کو دوبارہ بحال کرنے کا مطالبہ کیا جائے گا جبکہ اقوامِ متحدہ کو بھی ایک بار پھر جھنجھوڑا جائے گا۔
مزید پڑھیں: بھارتی اقدامات کشمیریوں کو اقلیت میں بدلنے کی سازش ہیں، وزیراعظم کا پیغام
حریت رہنماؤں نے غیرآئینی اقدام کے دوسال مکمل ہونے پر وادی میں مکمل ہڑتال اور احتجاج کا اعلان کیا، حریت پسند کشمیریوں نے مقبوضہ وادی میں جگہ جگہ بھارت مخالف پوسٹرز آویزاں بھی کردیے ہیں۔
مودی نواز انتظامیہ نے کشمیر میں ہڑتال اور مظاہرین کے احتجاج کی آواز دبانے کی کوشش کرتے ہوئے مقبوضہ وادی میں سیکیورٹی سخت کردی۔
مقبوضہ وادی میں بھارتی فوج نے جگہ جگہ ناکے لگا لیے ہیں جبکہ سڑکوں پر فوجی گاڑیاں گشت کررہی ہیں۔
