لاہور: پنجاب کے دارالحکومت لاہور میں مسلح ڈاکوؤں نے پیدل آکر فیملی کو لوٹا اور باآسانی فرار ہوگئے۔
اے آر وائی نیوز کے مطابق لاہور کے تھانہ مغل پورہ کی حدود میں تین ڈاکوؤں نے گلی سے جانے والی موٹر سائیکل سوار فیملی کو لوٹ لیا، واردات کی سی سی ٹی وی فوٹیج منظرعام پر آگئی۔
ویڈیو میں تینوں ڈاکوؤں کو موٹر سائیکل سوار فیملی کو روکتے دیکھا جاسکتا ہے۔
ڈاکوؤں نے اسلحہ کے زور پر فیملی سے 60 ہزار روپے، موبائل فون، موٹر سائیکل چھینی اور باآسانی فرار ہوگئے۔
متاثرہ شہری کی جانب سے تھانہ مغل پورہ میں تینوں ڈاکوؤں کے خلاف مقدمہ درج کرلیا گیا ہے۔
پولیس کا کہنا ہے کہ سی سی ٹی وی فوٹیج کی مدد سے ملزمان کی شناخت کی جائے گی اور ملزمان کو جلد گرفتار کرلیا جائے گا۔
واضح رہے کہ لاہور میں خواتین کے ساتھ واقعات کے بعد لوٹ مار کی وارداتیں بھی بڑھ گئی ہیں، پنجاب پولیس اسٹریٹ کرائمز کی وارداتوں میں قابو پانے میں ناکام ہے۔
