اسلام آباد: پاکستان کرکٹ بورڈ (پی سی بی) کے نئے چیئرمین کے لیے مشاورت حتمی مراحل میں داخل ہوگئی۔
اے آر وائی نیوز کے مطابق وزیراعظم عمران خان نے چیئرمین پی سی بی احسان مانی کو دوبارہ وزیراعظم ہاؤس بلایا، احسان مانی کی چوبیس گھنٹوں میں ان سے یہ دوسری ملاقات تھی۔
احسان مانی نے ڈومیسٹک کرکٹ کے معاملات سے متعلق وزیراعظم کو تفصیل سے بتایا۔
چیئرمین پی سی بی کی جانب سے وزیراعظم کو آئی سی سی ایونٹ سے متعلق بھی ہوم ورک مکمل کرکے بریف کیا گیا۔
ذرائع کا کہنا ہے کہ نئے چیئرمین پی سی بی کا اعلان جلد متوقع ہے۔
واضح رہے کہ گزشتہ روز ذرائع کا کہنا تھا کہ وزیراعظم اور پاکستان کرکٹ بورڈ کے پیٹرن ان چیف عمران خان نے چیئرمین پی سی بی احسان مانی کی پیٹھ تھپتھپادی۔
ادھر گزشتہ روز ہی سابق کپتان رمیز راجہ نے بھی وزیراعظم سے ملاقات کی جس میں انہوں نے کرکٹ سے متعلق تجاویز دیں۔
ذرائع کا بتانا تھا کہ رمیز راجہ کو کرکٹ بورڈ میں اہم عہدہ ملنے کا امکان ہے۔
یاد رہے کہ پاکستان کرکٹ بورڈ (پی سی بی) کے چیئرمین احسان مانی کی تین سالہ مدت آج ختم ہوگئی۔
