لاہور: وفاقی وزیراطلاعات و نشریات فواد چوہدری نے کہا ہے کہ نیب آرڈیننس کے معاملے پر اپوزیشن سے ایک اور رابطہ کرنے کا فیصلہ کیا ہے۔
اے آر وائی نیوز کے مطابق لاہور میں سینئر صحافیوں اور نیوز اینکرز سے غیر رسمی گفتگو کرتے ہوئے فواد چوہدری نے بتایا کہ حکومت نیب آرڈیننس کے معاملے پر اپوزیشن سے ایک اور رابطہ کرے گی۔
فواد چوہدری کا کہنا تھا کہ نیب ترامیم کے معاملے پر اپوزیشن سے بات چیت کیلئے اسپیکر اسد قیصر کو اہم ٹاسک سونپا گیا ہے، وہ اس معاملے پر اپوزیشن سے رابطہ کریں گے۔
مزید پڑھیں: وفاقی حکومت کا نیب ترمیمی آرڈیننس میں مزید ترامیم کا فیصلہ
وفاقی وزیر کا کہنا تھا کہ اپوزیشن نیب آرڈیننس میں جو ترمیم لاناچاہتی ہےحکومتی ٹیم اس کےساتھ بیٹھےگی اور بات کرے گی، آئندہ ہفتےنیب آرڈیننس پر اپوزیشن سے رابطہ کیا جائےگا۔
انہوں نے بتایا کہ اپوزیشن کی جانب سے پیش کی جانے والی جن ترامیم پر اتفاق ہوگا اس کو ایکٹ کیلئے بل میں شامل کیا جائے گا۔ وفاقی وزیر نے مہنگائی کا اعتراف کرتے ہوئے کہا کہ مہنگائی ضرورہے مگر بہت جلد اس پر قابوپالیں گے،کوشش ہوگی میڈیا سے ملاقاتوں کا سلسلہ جاری رہے۔
مزید پڑھیں: نئے نیب آرڈیننس کو حتمی قانونی حیثیت حاصل ہوگئی
یاد رہے کہ وفاقی کابینہ نے نیب آرڈیننس میں دو ترامیمی مسودوں کی منظوری دی تھی، جنہیں قانون بنانے کے لیے صدر مملکت ڈاکٹر عارف علوی کو دستخط کے لیے بھیجا گیا تھا۔ صدر مملکت کی جانب سے دستخط کے بعد نیب آرڈیننس نافذ العمل ہوگیا ہے۔
