اسلام آباد : پاکستان میں مثبت کورونا کیسز کی شرح 1.66 فیصد آگئی، ایک دن میں صرف 11 اموات ریکارڈ کی گئی اور 663 کیسز رپورٹ ہوئے۔
تفصیلات کے مطابق کورونا وائرس کی ہلاکت خیزی میں کمی کا سلسلہ جاری ہے، نیشنل کمانڈ اینڈ آپریشن سینٹر نے ملک میں جاری کورونا کی صورتحال کے حوالے سے تازہ اعدادو شمار جاری کردیئے ہیں۔
جس میں کہا گیا ہے کہ ملک میں کورونا کے مزید گیارہ مریض انتقال کرگئے، جس کے بعد اموات کی مجموعی تعداد 28 ہزار280 ہوگئی۔
این سی او سی کا کہنا تھا کہ ملک میں 24 گھنٹے میں 39ہزار 902کورونا ٹیسٹ کیے گئے ، جسمیں سے 663 نئے کورونا کیسز سامنے آئے اور اس دوران کورونا ٹیسٹ مثبت نکلنے کی شرح1.66 فیصد رہی۔
نیشنل کمانڈاینڈآپریشن سینٹر نے بتایا کہ ملک میں اس وقت کورونا کے تشویشناک کیسزکی تعداد ایک ہزار913 ہے جبکہ ملک بھر میں کورونا سے متاثر ہونے والوں کی مجموعی تعداد 12 لاکھ 65 ہزار 047 تک پہنچ گئی ہے۔
صوبوں میں کورونا کیسز کے اعدادو شمار کے مطابق سندھ میں کورونا کیسز کی تعداد چار لاکھ 65 ہزار819 ، پنجاب میں 4 لاکھ 37 ہزار 974 ،خیبرپختونخوا میں ایک لاکھ 76 ہزار 886 اور بلوچستان میں33 ہزار 128 ہے جبکہ گلگت بلتستان میں 10 ہزار 369، اور آزاد کشمیر میں34 ہزار 402 کیسز سامنے آچکے ہیں
