پاکستانی ڈرامہ انڈسٹری کی معروف اداکارہ سنیتا مارشل نے اپنی بیٹی زینہ کی ’آمین‘ کی تقریب کی ویڈیو اور تصاویر شیئر کردیں۔
شوبز انڈسٹری کی اداکارہ اور ماڈل سنیتا مارشل نے فوٹو اور ویڈیو شیئرنگ ایپ انسٹاگرام پر اپنی بیٹی زینہ کے قرآن پاک ختم ہونے کی خوشی میں منعقدہ ’آمین‘ کی تقریب کی تصاویر اور ویڈیو شیئر کیں۔
سنیتا مارشل کی جانب سے شیئر کی گئی ویڈیو میں دیکھا جاسکتا ہے کہ زینہ قرآن پاک کی تلاوت کررہی ہیں۔
اداکارہ نے فیملی کے ہمراہ تصویر بھی شیئر کی جس میں ان کے ساتھ شوہر اداکار حسن احمد، بیٹا اور بیٹی بھی موجود ہیں۔
سنیتا مارشل کی جانب سے شیئر کی گئی ویڈیو اور تصاویر کو مداحوں کی جانب سے خوب سراہا جارہا ہے اور ان کی بیٹی کو دعائیں بھی دی جارہی ہیں۔
یاد رہے کہ ایک انٹرویو کے دوران سنیتا کے شوہر حسن احمد کا بتانا تھا کہ ’میں نے اور سنیتا نے شادی کے وقت ہی یہ فیصلہ کرلیا تھا کہ ہمارے بچے مکمل طور پر صرف دینِ اسلام کی ہی پیروی کریں گے۔‘
اس دوران سنیتا مارشل کا کہنا تھا کہ ’اگر میری امّی کے گھر میں کرسمس یا عیسائی مذہب کی کوئی تقریب منعقد ہوتی ہے تو میرے بچے اُس میں شرکت ضرور کرتے ہیں لیکن چرچ نہیں جاتے۔‘
اداکارہ کا کہنا تھا کہ ’حسن احمد سے شادی سے لے کر اب تک میرے ہر فیصلے میں میرے والد نے ہمیشہ میرا ساتھ دیا ہے۔‘