کوئٹہ: بلوچستان کے علاقے قلعہ عبداللہ میں 15 ڈیم ٹوٹنے کی تحقیقات ہوں گی۔
اے آروائی نیوز براہِ راست دیکھیں live.arynews.tv پر
تفصیلات کے مطابق قلعہ عبداللہ میں مسلسل ڈیمز ٹوٹنے نے تباہی مچا دی ہے، چار مون سون اسپیلز سے 15 ڈیمز ٹوٹ چکے ہیں، جس کے باعث سیلابی ریلوں میں بہہ جانے سے 10 افراد جاں بحق، اور 8 زخمی ہوئے۔
ڈیم ٹوٹنے کے باعث ہزاروں ایکڑ زمین پر کاشت کی گئی فصلیں، انگور اور سیب کے باغات بھی سیلابی ریلوں میں بہہ کر تباہ ہو گئے، جس سے مقامی کاشت کاروں کو بہت بڑا نقصان اٹھانا پڑا۔
صوبائی حکومت نے ڈیموں کی تعمیر میں ناقص میٹیریل کے استعمال پر کمیٹی بنا دی ہے۔
صوبائی وزیر خوراک انجینئر زمرک خان اچکزئی کا کہنا تھا کہ ڈیموں کے ٹوٹنے اور سیلابی ریلوں سے کوئی گاؤں اور گھر نہیں بچا۔
انجینئر زمرک خان اچکزئی نے کہا کہ موجودہ صوبائی حکومت کے دور میں بننے والے ڈیموں میں اگر ناقص میٹیریل استعمال کیا گیا ہے، تو اس کی انکوائری ہوگی، جو بھی مجرم ہوا اس کے خلاف کارروائی کی جائے گی۔
