کراچی : پولیس نے کالعدم ایس آر اے کا دہشت گرد گرفتار کرلیا، دوران تفتیش ملزم نے رینجرز پر دستی بم حملوں کا انکشاف کیا۔
تفصیلات کے مطابق کراچی پولیس نے کارروائی کرتے ہوئے کالعدم ایس آر اے کا دہشت گرد گرفتار کرلیا۔
ایس ایس پی ملیرعرفان بہادر نے بتایا کہ دہشت گردحنیف عرف بلو بادشاہ کانام ریڈ بک میں شامل ہے اور کراچی ، اندرون سندھ رینجرز پر دستی بم حملوں میں ملوث ہے۔
عرفان بہادر کا کہنا تھا کہ گرفتار دہشت گرد نے افغانستان سے ٹریننگ حاصل کی۔
کراچی:گرفتاردہشت گردحنیف عرف بلوبادشاہ نے دوران تفتیش انکشافات کرتے ہوئے بتایا دہشت گرد کارروائیوں کیلئے رابطہ موبائل ایپ کےذریعے کرتے تھے۔
دہشت گرد نے بیان میں کہا کہ پہلی واردات گلستان جوہر کامران چورنگی میں کی، 10جون 2020 کو رینجرز پر دستی بم حملہ اور 19جون کو گھوٹکی میں رینجرز کی موبائل پر حملہ کیا۔
دہشت گرد نے دوران تفتیش اعتراف کیا کہ 4 جولائی 2020 کو پنو عاقل میں رینجرز کی گاڑی پر دستی بم اور 5 اگست 2020 کو کراچی میں کشمیر ریلی پر دستی بم پھینکا تھا۔
ملزم نے بتایا کہ 15 دسمبر2020 کو کلفٹن میں چائنا ریسٹورنٹ کے مالک کی گاڑی پر بم لگایا اور 22 دسمبر 2020 کو سپر ہائی وے جمالی پل پر چینیوں پر فائرنگ کی۔
گرفتاردہشت گرد نے مزید کہا کہ 2019 میں قائد آباد پل پر بارودی مواد سے دھماکا کرنے کی کوشش کی، وارداتوں کا حکم کالعدم تنظیم کا کمانڈر اصغر اورسجاد شاہ دیتا تھا۔
ایس ایس پی ملیرعرفان کا کہنا ہے کہ گرفتار دہشت گرد کے ساتھیوں کی تلاش جاری ہے۔
