لاہور: انسدادِ دہشتگردی کی عدالت نے سزائے موت کے دو قیدیوں کو چودہ جنوری کو پھانسی دینے کی تاریخ مقرر کر دی ہے۔
لاہور کی انسدادِ دہشتگردی کی عدالت میں فیصل آباد جیل سپرنٹنڈنٹ نے دو قیدیوں کے ڈیتھ وارنٹ کی درخواست دائر کی تھی، قیدی فیض اور شریف نے ننکانہ صاحب میں حساس ادارے کے اہلکار طارق کو شہید کیا تھا اور اس جرم میں عدالت نے انہیں سزائے موت سنائی تھی اور ان دنوں دونوں قیدی فیصل آباد جیل میں قید ہیں۔
انسدادِ دہشتگردی کی خصوصی عدالت نے مجرموں کے ڈیتھ وارنٹ جاری کرتے ہوئے انہیں 14 جنوری کو پھانسی کیلئے تاریخ مقرر کی ہے۔
- Advertisement -
واضح رہے کہ سانحۂ پشاور کے بعد وزیرِاعظم نواز شریف نے پھانسی کی سزا پر پابندی ختم کردی تھی، جس کے بعد سے اب تک چھ مجرموں کو پھانسی دی جاچکی ہے، جن میں مشرف حملہ کیس اور جی ایچ کیو پر حملہ کرنے والے دہشتگرد شامل تھے۔
