اسلام آباد:ترجمان دفتر خارجہ قاضی خلیل اللہ کا کہنا ہے کہ پاکستان بھارت سمیت تمام پڑوسی ممالک سے پُرامن تعلقات چاہتا ہے، پاکستان اپنے تمام مفادات کے تحفظ کے لیے تمام کوششیں کررہا ہے، پاکستان ہر طرح کے خطرے سے نمٹنے کے لیے مکمل تیار ہے، بھارت کی طرف سے مسلسل غیرذمہ دارانہ بیانات دیئے جارہے ہیں۔
اسلام آباد میں ترجمان دفتر خارجہ قاضی خلیل اللہ نے ہفتہ وار بریفنگ دیتے ہوئے کہا کہ پاکستان بین الاقوامی قوانین کی خلاف ورزی نہیں کررہا ہے، پاکستان اور بھارت کے درمیان سنجیدہ مسائل ہیں، جن کو بیانات کے ذریعے نہیں مذاکرات کے ذریعے حل کرنا چاہیے۔
قاضی خلیل اللہ نے کہا کہ پاکستان پُر امن طریقے سے بھارت کے ساتھ تمام مسائل پر کا حل چاہتا ہے۔
ترجمان کا کہنا تھا کہ پاکستان اور چین اپنے منصوبے مکمل کرنے کیلئے پُرعزم ہیں، منصوبے پاکستان اور علاقے کی ترقی کے لیے اہم ہیں۔
انہوں نے کہا کہ پاکستان اور افغانستان کے درمیان اچھے تعلقات ہیں، دونوں ملکوں نے اپنی سرزمین ایک دوسرے کے خلاف استعمال نہ کرنے کا فیصلہ کیا ہے۔
