پاکستانیوں کے لیے حج میں نئی رکاوٹ پیدا ہوگئی ہے اور ڈالرز کی قلت نے مشکلات کھڑی کر دیں وزارت مذہبی امور نے حج کے لیے حکومت سے فنڈز مانگ لیے ہیں۔
اے آر وائی نیوز کے مطابق پاکستانیوں کے لیے حج میں نئی رکاوٹ پیدا ہوگئی ہے اور ڈالرز کی قلت نے مشکلات کھڑی کر دیں اور ذرائع کا کہنا ہے کہ وزارت مذہبی امور نے حج 2023 کے لیے وزارت خزانہ سے مزید 33 ملین ڈالر مانگ لیے ہیں۔
ذرائع وزارت مذہبی امور کے مطابق اس حوالے سے وزارت خزانہ کو درخواست دی گئی ہے جس میں کہا گیا ہے کہ اسپانسر شپ اسکیم کے تحت ڈالر نہیں ملے۔ اسپانسرز اسکیم میں ڈالر توقع کے مطابق نہ آنے پر مجموعی طور پر123 ملین درکار ہوں گے لہذا وزارت خزانہ مزید ڈالرز کی فراہمی ممکن بنائے۔
ذرائع کا کہنا ہے کہ اسپانسر شپ اسکیم کے تحت مطلوبہ ڈالرز ملتے تو وزرات خزانہ 90 ملین ڈالرز دیتی اور اب مزید 33 ملین مجموعی طور پر 123 ملین ڈالرز درکار ہوں گے۔
ذرائع کے مطابق وزارت مذہبی امور کو گورنمنٹ ریگولر اسکیم کے تحت 43 ہزار 308 کےکوٹے پر بینکوں میں 72869 درخواستیں موصول ہوئیں۔ بینکوں سے تمام تفصیلات لے کر حتمی درخواستوں کا تعین 4 اپریل کو ہوگا۔
ذرائع کا کہنا ہے کہ اسپانسر شپ اسکیم کے تحت بینکنگ کم ہونے پر کوٹہ سعودی حکومت کو واپس کیا جا سکتا ہے۔
زاہد حسین مشوانی اے آر وائی نیوز کے سینئیر صحافی ہیں ،پارلیمنٹ ،انتخابات ،الیکشن کمیشن آف پاکستان کے علاوہ مذہبی اور سیاسی امور پر گہری نظر رکھتے ہیں۔