کراچی میں سی ٹی ڈی انٹیلی جنس بیسڈ نے مختلف علاقوں میں کارروائیاں کیں اور کرمشل آتش گیر مادے کے غیر قانونی کاروبار میں ملوث ملزم کو گرفتار کر لیا۔
انچارج سی ٹی ڈی راجا عمر خطاب نے میڈیا کو بتایا کہ کمرشل آتش گیر مادے کے غیر قانونی کاروبارمیں ملوث ملزم عابد کو گرفتار کر کے اس کے قبضے سے آتشبازی کے سامان کے پانچ بورے برآمد کیے گئے ہیں۔
راجا عمر خطاب کے مطابق ملزم کافی عرصے سے کمرشل آتش گیر مادے کے غیر قانونی کاروبار میں ملوث تھا جس نے تفتیش میں کئی ہم انکشافات کیے ہیں جس کی بنیاد پر مزید کارروائیاں جاری ہیں۔ غیر قانونی کام میں چند ٹرانسپورٹرز کے نام بھی سامنے آئے ہیں۔
ان کا کہنا تھا کہ سالانہ انٹیلی جنس کوآرڈنیشن کا 26 واں اجلاس گزشتہ ماہ اسلام آباد میں ہوا تھا جس میں چاروں صوبوں سمیت اسلام آباد، کشمیر اور گلگت بلتستان کے سی ڈی ٹی افسران شریک ہوئےتھے۔
انچارج سی ٹی ڈی نے بتایا کہ اس اجلاس میں ملکی سلامتی کی مجموعی صورتحال پر غور کیا گیا اور کمرشل آتش گیر مادے کے دہشتگردی میں استعمال پر خرید و فروخت کی مانیٹرنگ کرنے کا ٹاسک دیا گیا جب کہ آئی جی سندھ نے سی ٹی ڈی انٹیلی جنس کراچی کو یہ ٹاسک سونپا تھا۔
عمر خطاب نے کہا کہ کمرشل آتش گیز مادے کے کاروبار کا لائسنس متعلقہ ڈی سی آفس جاری کرتا ہے اور آتش گیر مادے کی ذخیرہ کرنے کی سیفٹی شرائط اور مخصوص مقداررکھنے کی اجازت ہوتی ہے تاین یہ افراد مخصوص مقدار سے کہیں زیادہ آتش گیر مادہ اپنے پاس اسٹاک کرتے ہیں۔
انچارج سی ٹی ڈی نے مزید بتایا کہ آتش گیر مادہ کی خرید و فروخت کا ریکارڈ نہیں رکھا جاتا، دوسرے صوبے سے بڑی مقدار میں آتش گیر مادے کا سامان بلٹی کے ذریعے کراچی منگوایا جاتا ہے اور اس کی نقل وحرکت کے دوران سیفٹی کا بھی کوئی خیال نہیں رکھا جاتا۔
