تازہ ترین

کراچی : شادی میں ہوائی فائرنگ : دو بہنیں شدید زخمی

کراچی : شہر قائد کے علاقے موسیٰ کالونی میں شادی کی تقریب میں ہوائی فائرنگ کی زد میں آکر دو بہنیں زخمی ہوگئیں، زخمیوں کے اہل خانہ نے عباسی شہید اسپتال عملے پر علاج نہ کرنے کا الزام عائد کردیا۔

تفصیلات کے مطابق موسیٰ کالونی میں گجرنالے کے قریب شادی کی تقریب میں ہوائی فائرنگ کی جارہی تھی، کہ اس دوران وہاں سے گزرنے والی دو بہنیں فائرنگ کی زد میں آگئیں۔

پولیس حکام کا کہنا ہے کہ باراتیوں کی ہوائی فائرنگ سے2بہنیں زخمی ہوگئیں جنہیں اسپتال منتقل کیا گیا۔ زخمیوں میں 20سالہ یاسمین اور6سالہ ماریہ شامل ہیں۔

زخمی بہنوں کے اہل خانہ نے میڈیا کو بتایا کہ علاقے میں کم عمر لڑکے علاقےمیں ہوائی فائرنگ کررہے تھے کہ مدرسے جاتے ہوئے ایک بچی اور اس کی بہن کو گولی لگی۔

زخمی ہونے والی لڑکی نے اےآروائی نیوزسےگفتگو کرتے ہوئے کہا کہ کئی گھنٹے سے عباسی شہید اسپتال میں موجود ہیں، گولی جسم میں پھنسی ہوئی ہے لیکن کوئی علاج نہیں کررہا، مجھے مدد چاہیے۔

مزید پڑھیں : شادی میں فائرنگ سے پولیس اہلکار جاں بحق، دولہا گرفتار

یاد رہے کہ رواں سال مئی میں اورنگی ٹاؤن میں شادی کی تقریب میں ہوائی فائرنگ سے دولہا کا بھائی جو خود بھی پولیس اہلکار تھا جان سے گیا، پولیس نے ہال منیجر اور دولہا کے بھائی کو حراست میں لے لیا تھا۔

مقتول پولیس اہلکار کے اہل خانہ کے مطابق ہارون اپنی گولی سے زخمی ہوا، مقتول ہارون اپنے بھائی کی شادی میں فائرنگ کررہا تھا۔

Comments

- Advertisement -