کراچی کے بعد اب لاہور ائیرپورٹ کی حدود میں مسافر طیاروں کی لینڈنگ کے دوران لیزر لائٹیں مارنے کے واقعات میں اضافہ ہوگیا جو کسی بھی حادثے کا سبب بن سکتے ہیں۔
ترجمان سول ایوی ایشن کے مطابق اب تک علامہ اقبال انٹرنیشنل ایئرپورٹ پر لیزر اور ہیوی لائٹ کے10واقعات رپورٹ ہوئے ہیں۔
اس حوالے سے ذرائع کا کہنا ہے کہ شاپنگ سینٹرز اور ریسٹورنٹس پر لگی ہیوی لائٹیں بھی طیاروں کی سیفٹی کیلئے خطرہ ہیں۔
ایئر ٹریفک کنٹرولرذرائع نے بتایا کہ لاہور ایئرپورٹ پر لینڈنگ کرنے والے مسافر طیاروں پر لیزر لائٹس ماری گئیں۔
ملکی و غیرملکی ائیرلائنز نے ایئر ٹریفک کنٹرولر کو خدشات سے آگاہ کردیا پائلٹس نے رات کے وقت لینڈنگ کیلئے اپروچ کے دوران لیزر لائٹ مارے جانے کی شکایت کی ہے۔
ائیرپورٹ انتظامیہ، پولیس اور ضلعی انتظامیہ کا کہنا ہے کہ لیزر لائیٹس مارنے والوں کے خلاف کارروائی عمل میں لائی جائے گی۔
