بالی ووڈ کے معروف اداکار اجے دیوگن اپنی نئی آنے والی فلم ’سنگھم اگین‘ کی شوٹنگ کے دوران زخمی ہوگئے۔
بھارتی میڈیا رپورٹس کے مطابق اجے دیوگن اپنی ہٹ فلم سنگھم کے سیکوئل ’سنگھم اگین‘ کی شوٹنگ کے دوران لڑائی کے ایک منظر کی شوٹنگ کرواتے ہوئے زخمی ہوئے۔
شوٹنگ کے دوران اجے دیوگن کی آنکھ مُکا لگنے سے زخمی ہوئی جس کے بعد فوری طور پر فلم کے سیٹ پر ڈاکٹر کو بلایا گیا۔
رپورٹ کے مطابق اجے دیوگن نے زخمی ہونے کے بعد شوٹنگ سے مختصر وقفہ لیا لیکن شوٹنگ کو متاثر نہیں ہونے دیا اور بعد میں شوٹنگ مکمل کروائی۔
واضح رہے کہ اجے دیوگن سنگھم اگین میں بھی پولیس انسپکٹر کا مرکزی کردار ادا کررہے ہیں۔
روہت شیٹی کی ہدایت کاری میں بننے والی فلم سنگھم اگین آئندہ سال بڑے پردے کی زینت بنے گی، جس کی کاسٹ میں دپیکا پڈوکون، اکشے کمار، کرینہ کپور، رنویر سنگھ، ٹائیگر شیروف، جیکی شیروف، ارجن کپور، شیوتا تیواڑی ودیگر شامل ہیں۔
