اسلام آباد : چیئرمین پی ٹی آئی عمران خان سمیت پی ٹی آئی کے21رہنماؤں کیخلاف ایک اورمقدمہ درج کرلیا گیا ، مقدمےمیں دہشت گردی، کار سرکارمیں مداخلت اورمزاحمت کی دفعات شامل کی گئیں۔
تفصیلات کے مطابق ہائی کورٹ آمد پر ہنگامہ آرائی کے معاملے پر چیئرمین تحریک انصاف عمران خان سمیت پی ٹی آئی کے 21 رہنماؤں کیخلاف ایک اور مقدمہ درج کرلیا۔
مقدمے میں پی ٹی آئی کے 250 کارکنان کو بھی نامزد کیا گیا ہے اور مقدمے میں دہشت گردی، کار سرکار میں مداخلت اور مزاحمت کی دفعات شامل کی گئیں ہیں۔
مقدمے کے متن میں کہا ہے کہ عمران خان ہجوم کو لیکر جوڈیشل کمپلیکس پہنچے، کارکنان نے ہاتھوں میں اسلحہ، ڈنڈے اور جھنڈے پکڑ رکھے تھے۔
متن میں کہا گیا کہ ہجوم نےپی ٹی آئی رہنماؤں کی قیادت میں ہائیکورٹ میں داخل ہونے کی کوشش کی ، ہجوم نے پولیس اور دیگر کوجان سے مارنے کی دھمکیاں دیں اور سیف کیمروں، بینچز سمیت سرکاری املاک کو نقصان پہنچایا گیا۔
راجہ خرم، مراد سعید، علی نواز، عامرکیانی ، فرخ حبیب سمیت دیگر مقدمے میں شامل ہیں ، جوڈیشل کمپلیکس اور ہائی کورٹ ہنگامہ آرائی کے الگ الگ مقدمات درج کئے گئے ہیں۔
