اسلام آباد : عوامی نیشنل پارٹی ( اےاین پی) نے بلوچستان سے منتخب سینیٹرعمر فاروق کو ڈپٹی چیئرمین سینیٹ کا امیدوار نامزد کردیا۔
تفصیلات کے مطابق چیئرمین اور ڈپٹی چیئرمین سینیٹ کا انتخاب آج ہورہا ہے ، عوامی نیشنل پارٹی ( اےاین پی) نےڈپٹی چیئرمین سینیٹ کےلیے اپنا امیدوارنامزدکردیا۔
ذرائع نے بتایا کہ اے این پی نےبلوچستان سےمنتخب سیینٹرعمرفاروق کو ڈپٹی چیئرمین کا امیدوار نامزدکیا ہے۔
حکومت اور اتحادیوں نے ڈپٹی چیئرمین سینیٹ کا عہدہ ن لیگ کو دینے کا فیصلہ کیا تھا، چیئرمین کیلئے یوسف رضاگیلانی حکومتی اتحادکے امیدوار ہیں۔
پی ٹی آئی کے بائیکاٹ کے باعث گیلانی کے بلامقابلہ منتخب ہونے کا امکان ہے تاہم اے این پی کا امیدوار آنے پر ڈپٹی چیئرمین سینیٹ کیلئےووٹنگ ہوگی ۔
خیال رہے ایوان بالاکےنومنتخب اراکین کی حلف برداری کے بعد چیئرمین وڈپٹی چیئرمین کا چناؤ آج ہوگا، چیئرمین و ڈپٹی چیئرمین سینیٹ کا چناؤ خفیہ رائے شماری سے کیا جائے گا۔
چیئرمین وڈپٹی چیئرمین سینیٹ کے انتخاب کیلئے 85 سینیٹرز اپنا حق رائے دہی استعمال کریں گے، حلف برداری کے بعد پریزائیڈنگ آفیسر چیئرمین وڈپٹی چیئرمین سینیٹ کے انتخاب کا شیڈول جاری کریں گے۔
چیئرمین وڈپٹی چیئرمین سینیٹ کے انتخاب میں حصہ لینے والے امیدوار سیکرٹری سینیٹ سے کاغذات موصول اور جمع کراسکتے ہیں ، جس کے بعد سینیٹ سیکرٹریٹ انتخاب میں حصہ لینے والے امیدواروں کی فہرست جاری کرے گا۔
امیدواروں کے اعلان کے بعد چیئرمین سینیٹ اور ڈپٹی چیئرمین سینیٹ کے لئے سیکرٹ ووٹنگ ہوگی اور ایوان میں سادہ اکثریت سے چیئرمین اور ڈپٹی چیئرمین کا چناؤ کیا جائے گا۔
ایوان بالامیں کل ممبران 96 جبکہ موجودہ اراکین کی تعداد 85 ہے تاہم الیکشن کمیشن خیبر پختونخوا سے سینیٹ کی 11 نشستوں پر انتخاب ملتوی کر چکا ہے۔
