لاہور: محمد خان بھٹی کو اینٹی کرپشن نے گرفتار کر لیا۔
تفصیلات کے مطابق سابق پرنسپل سیکریٹری محمد خان بھٹی کو اینٹی کرپشن نے کیمپ جیل سے رہائی کے بعد گرفتار کر لیا۔ محمد خان بھٹی کی آج سیشن کورٹ نے ایف آئی اے کیس میں ضمانت منظور کی تھی، اور ان کو رہا کرنے کا حکم دے دیا تھا۔
تاہم اینٹی کرپشن کی گوجرانوالہ کی ٹیم محمد خان بھٹی کی گرفتاری کے لیے پولیس کے ہمراہ کیمپ جیل پہنچ کر باہر انتظار کرنے لگی تھی، اس دوران محمد خان بھٹی کے وکلا بھی جیل کے باہر موجود تھے۔
ذرائع کا کہنا ہے کہ محمد خان بھٹی کو اینٹی کرپشن کے مقدمہ نمبر 84/23 میں گرفتار کیا گیا ہے، ان پر منڈی بہاؤالدین میں سڑک کی تعمیر میں رشوت لینے کا الزام ہے، محمد خان بھٹی نے اختیارات کا ناجائز استعمال کر کے رشوت وصول کی۔
واضح رہے کہ سابق وزیر اعلیٰ پنجاب پرویز الہٰی کے سابق پرنسل سیکریٹری محمد خان بھٹی کے خلاف محکمہ اینٹی کرپشن تحقیقات کر رہا ہے، اینٹی کرپشن نے اس سلسلے میں پنجاب اسمبلی میں بھرتیوں اور ٹرانسفر پوسٹنگ کا ریکارڈ حاصل کر کے چھان بین کی ہے۔
