پشاور : وزیراعظم شہبازشریف کی زیرصدارت ایپکس کمیٹی کا اجلاس اختتام پذیر ہوگیا، جس میں دہشت گردی کی حالیہ لہر کے حوالے سے تفصیلی گفتگو اور فیصلے کیے گئے۔
پشاور میں ہونے والے ایپکس کمیٹی کے اجلاس میں دہشت گردی کے واقعات خصوصاً سانحہ پشاوراور بعد کی صورتحال کا تفصیلی جائزہ لیا گیا۔
یہ اہم اجلاس پانچ گھنٹے سے زائد وقت تک جاری رہا جس میں آرمی چیف، وفاقی وزراء، چاروں صوبوں کے وزرائے اعلیٰ اور دیگر نے شرکت کی۔
اجلاس میں مجموعی سیکیورٹی صورتحال اور دہشت گردوں کیخلاف کارروائیوں پر بریفنگ دی گئی، اجلاس کو پشاور پولیس لائنز مسجد خودکش حملے کی تحقیقات میں پیشرفت سے آگاہ کیا گیا۔
شہداء کےدرجات کی بلندی اور ان کے اہل خانہ کیلئے صبرجمیل اور زخمیوں کی جلد صحت یابی کیلیے خصوصی دعا کی گئی۔ ایپکس کمیٹی کی جانب سے متاثرہ خاندانوں سے ہمدردی اور شہداء کا خون رائیگاں نہ جانے دینے کے عزم کا اعادہ کیا گیا۔
شرکاء کا کہنا تھا کہ بےگناہوں کا خون بہانے والےدہشت گردوں کو عبرت کا نشان بنادیں گے، معصوم پاکستانیوں پرحملہ کرنے والے ہرصورت سزا پائیں گے۔
اس موقع پر فیصلہ کیا گیا کہ قوم کی جان ومال کا تحفظ ہرقیمت پر یقینی بنایا جائے گا، دہشت گردی کیخلاف بےمثال شجاعت پرسیکیورٹی فورسزکو سلام اور شہداء کوخراج عقیدت پیش کرتے ہیں۔
ایپکس کمیٹی کے اجلاس میں شرکاء نے تمام طبقات خصوصاً میڈیا سےدہشت گردی کے واقعات سے متعلق ذمہ دارانہ رویہ اپنانے کی اپیل کی۔
اجلاس سےخطاب کرتے ہوئے وزیراعظم شہبازشریف پشاور پولیس لائنز مسجد میں ہونے والے دہشت گردی کے واقعہ میں ہم شہدا کے لواحقین کے غم میں برابر کےشریک ہیں۔
وزیراعظم نے کہا کہ شہداء کے لواحقین کو20،20لاکھ روپے جبکہ واقعے میں زخمی ہونے والوں کو فی کس 5،5لاکھ روپے دیے جائیں گے۔
انہوں نے کہا کہ ہم نے چند سال قبل دہشت گردی پر مکمل قابو پالیا تھا، قوم سوال کررہی ہے کہ دہشت گردی اب دوبارہ کیوں سراٹھارہی ہے؟ پوری پاکستانی قوم دہشت گردی کےخلاف جنگ میں متحد ہے۔
انہوں نے کہا کہ آپریشن ضرب عضب اورردالفساد جیسے آپریشنز میں قوم کی جانب سے عظیم قربانیاں دی گئیں، پاک فوج نے دلیری اور بہادری سے دہشت گردی کا بھرپور مقابلہ کیا۔
شہباز شریف کا کہنا تھا کہ ہرکسی کو اپنی ذمےداری کے بارے میں بات کرنا ہوگی، این ایف سی ایوارڈ کے تحت خیبرپختونخوا کو417ارب روپے دیے گئے۔
کے پی حکومت نے گزشتہ13سال میں دیے گئے417ارب کہاں خرچ کیے؟ خیبرپختونخوا حکومت کو دیئے گئے417ارب کا آڈٹ ہونا چاہیے۔ وفاق چاروں صوبوں میں سی ٹی ڈی کو مستحکم کرنے کیلئے اقدامات کرے گا، دہشت گردی کے مکمل خاتمے تک سکون سے نہیں بیٹھیں گے۔
