ٹیکنالوجی کمپنی ایپل نے مخصوص آئی فون رکھنے والوں کو ڈیوائس کی سست روی کے لیے فی کس 5 ہزار روپے دینے کا فیصلہ کر لیا ہے۔
تفصیلات کے مطابق آئی فون کے منتخب صارفین کو ان کے فون کی جان بوجھ کر سست کی گئی کارکردگی کے لیے تلافی کے طور پر ایپل کمپنی رقم دینے کا سلسلہ شروع کر رہی ہے۔
ایپل آئی فون 6، 7 یا آئی فون ایس ای سیریز کے صارفین کو 5000 روپے فی کس ادا کرے گا، اس کی وجہ یہ ہے کہ کمپنی نے جان بوجھ کر آئی فونز کی کارکردگی کو سست کر دیا تھا، جس کا اعتراف بھی کیا گیا۔
یہ تنازع پانچ سال پرانا ہے، جس میں صارفین کی جانب سے الزامات لگائے گئے تھے کہ ان کے آئی فون 6، آئی فون 7، اور آئی فون ایس ای ماڈلز کو ایپل کی جانب سے قصداً سست کر دیا گیا ہے۔
برسوں کی بحث اور قانونی لڑائیوں کے بعد آخر کار ایپل نے 2020 میں پانچ سو ملین ڈالر تک کی خاطر خواہ رقم ادا کر کے معاملہ طے کرنے پر اتفاق کیا تھا۔
یاد رہے کہ ایپل کے جان بوجھ کر آئی فون کی سست روی سے متعلق تنازع 2016 میں شروع ہوا جب کمپنی نے پرانے آئی فونز کی کارکردگی کو قصداً کم کرنے کا اعتراف کیا۔ تاہم ایپل نے واضح کیا کہ اس کارروائی کا مقصد صارفین کو نقصان پہنچانے یا تکلیف پہنچانے کے ارادے کی بجائے فون کے اچانک بند ہونے کے معاملے کو روکنا تھا، اس وضاحت کو کچھ لوگوں نے تسلیم کیا لیکن اکثریت نے اسے مسترد کر دیا۔
بعد ازاں ایپل کے خلاف 2018 میں کلاس ایکشن مقدمہ قائم ہوا، یہ قانونی کارروائی بنیادی طور پر متاثرہ ڈیوائسز جیسا کہ آئی فون 6، آئی فون 6 پلس، آئی فون 6 ایس، آئی فون 6 ایس پلس، آئی فون ایس ای، آئی فون 7، اور آئی فون 7 پلس والے صارفین کی جانب سے لائی گئی تھی۔
یہ اختلاف فریقین کے درمیان 2020 تک برقرار رہا، یہاں تک کہ کمپنی نے حل کی طرف قدم اٹھا لیا، قانونی کارروائی کے دوران کسی برے نتیجے سے بچنے کے لیے ایپل کمپنی پانچ سو ملین ڈالر کی رقم ادا کرنے کے لیے تیار ہو گئی ہے، سیلیکون ویلی کے مطابق اس رقم میں ہر متاثرہ آئی فون صارف کو تقریباً 65 ڈالر ملیں گے۔
معاوضہ کن کو ملے گا؟
اگر آپ کے پاس آئی فون 6، 7، یا پہلا SE ماڈل تھا، تو آپ سوچ سکتے ہیں کہ کیا آپ کو معاوضے کے حصے کے طور پر رقم ملے گی؟
یہ نوٹ کرنا ضروری ہے کہ معاوضے کے لیے رجسٹریشن کی مدت 6 اکتوبر 2020 کو بند ہو گئی تھی، صارفین کو اپنے آئی فونز کے سیریل نمبرز کو ایک مخصوص ویب سائٹ پر رجسٹر کرنے کی ضرورت تھی، جو شکایات کے سلسلے میں خاص طور پر ایپل کی طرف سے بنائی گئی تھی۔
