قومی کرکٹ ٹیم کے سابق فاسٹ بولر عاقب جاوید نے شاہین شاہ آفریدی کی فٹنس سے متعلق اہم بیان جاری کیا ہے۔
عاقب جاوید نے نجی چینل پر گفتگو کرتے ہوئے کہا کہ شاہین آفریدی نے میچ میں سو فیصد پرفارمنس نہیں دی، دیکھنا ہوگا کہ شاہین پوری طرح فٹ ہیں یا نہیں کیوں کہ گھٹنے کی انجری کے بعد فاسٹ بولر یا تو پوری طرح فٹ ہوتا ہے یا پھر فٹ نہیں ہوتا۔
عاقب جاوید کا کہنا تھا کہ کل کے میچ میں شاہین آفریدی فٹ نظر نہیں آ رہے تھے، انھیں بھاگنے میں بھی مشکل پیش آ رہی تھی۔
واضح رہے کہ گزشتہ روز بھارت کے خلاف سپر 12 مرحلے کے میچ میں شاہین شاہ آفریدی نے 4 اوورز میں 34 رنز دیے اور کوئی وکٹ نہ لے سکے جب کہ میچ میں بھارت نے پاکستان کو سنسنی خیز مقابلے کے بعد آخری گیند پر شکست دی۔
خیال رہے کہ شاہین شاہ آفریدی نے انجری کے بعد لندن میں ری ہیب مکمل کرنے کے بعد ٹی ٹوئنٹی ورلڈ کپ سے قبل پاکستانی ٹیم کو جوائن کیا تھا اور انگلینڈ اور افغانستان کے خلاف وارم اپ میچز میں بولنگ بھی کی تھی۔
