اسلام آباد: صدر مملکت آصف علی زرداری نے چین کے صدر شی جن پنگ کو خط لکھا ہے جس میں انہوں نے شکریہ ادا کیا ہے۔
تفصیلات کے مطابق چینی صدر شی جن پنگ کی جانب سے تہنیتی پیغام پر صدرِ مملکت آصف علی زرداری نے اُن کا شکریہ ادا کیا ہے۔
صدر آصف علی زرداری نے اپنے خط میں لکھا ہے کہ چین کے ساتھ سدا بہار شراکت داری مضبوط بنانے کے لیے پرعزم ہیں، پاکستان اور چین محض پڑوسی نہیں بلکہ آہنی بھائی ہیں۔
صدر مملکت نے کہا کہ دونوں ممالک کی مضبوط دوستی علاقائی امن، استحکام اور ترقی کیلئے کلید کی حیثیت رکھتی ہے، پاکستان اور چین نے دوطرفہ تعاون کے مختلف شعبوں میں نمایاں پیشرفت کی۔
صدر مملکت نے کہا کہ تاریخ نے پاکستان اور چین کو ایک منفرد رشتے میں جوڑا ہے مشترکہ خیالات سے پاک چین تعلقات مزید مستحکم ہوئے ہیں۔
صدر مملکت آصف علی زرداری نے چین کے ساتھ عملی تعاون مزید مستحکم بنانے کے عزم کا اعادہ کیا ہے۔ واضح رہے کہ چینی صدر شی جن پنگ نے صدر آصف زرداری کو پاکستان کے 14ویں صدر کا عہدہ سنبھالنے پر مبارکباد دی تھی۔
اپنے پیغام میں شی جن پنگ نے کہا تھا کہ چین اور پاکستان اچھے پڑوسی، دوست، شراکت دار اور بھائی ہیں اور دونوں ممالک کی آہنی دوستی دونوں عوام کے لیے قیمتی خزانہ ہے۔
