لاہور: پنجاب میں آصف زرداری کی سیاسی سرگرمیاں جاری ہیں، مختلف علاقوں سے کئی اہم شخصیات پیپلز پارٹی میں شامل ہو گئی ہیں۔
تفصیلات کے مطابق ڈیرہ غازی خان، گوجرانوالہ اور جلالپور بھٹیاں سے اہم سیاسی شخصیات نے پاکستان پیپلز پارٹی میں شمولیت اختیار کر لی ہے، آصف زرداری نے انھیں پارٹی پرچم پہنائے۔
پی پی میں شامل ہونے والوں میں تونسہ سے حافظ طاہر احمد قیصرانی، امام بخش قیصرانی، اور عرفان گردیزی شامل ہیں، حافظ طاہر قیصرانی نے مخدوم احمد محمود کے ہمراہ آصف زرداری سے ملاقات کی، جس میں نیئر بخاری، دوست محمد کھوسہ، عبدالقادر شاہین بھی موجود تھے۔
حافظ طاہر احمد قیصرانی تونسہ سے پیپلز پارٹی کے ٹکٹ پر الیکشن لڑیں گے، آصف زرداری کی زیر صدارت پیپلز پارٹی وسطی پنجاب کا اجلاس بھی منعقد ہوا، جس میں رانا فاروق سعید، حسن مرتضٰی ،شہزاد چیمہ اور فیصل میر شریک ہوئے۔ اجلاس میں آصف زرداری نے عہدے داروں سے تنظیمی امور اور انتخابی تیاریوں پر مشاورت کی۔
این اے 74 گوجرانوالہ سے چوہدری علی اشرف وڑائچ نے آصف زرداری سے ملاقات میں پی پی میں شمولیت اختیار کی، پی پی 58 گوجرانوالہ سے چوہدری حارث میراں نے سابق صدر سے ملاقات کی اور وہ پی پی میں شامل ہو گئے، اس ملاقات میں نیر حسین بخاری، سید حسن مرتضیٰ،امتیاز صفدر وڑائچ، اظہر حسن ڈار، ودود ڈار و دیگر بھی موجود تھے۔
این اے 79 حافظ آباد جلال پور بھٹیاں سے چوہدری انصر کی بھی آصف زرداری سے ملاقات ہوئی ہے، چوہدری انصر بھی پیپلز پارٹی میں شامل ہو گئے ہیں۔
