اسلام آباد : ماہر قانون اعتراز احسن کا کہنا ہے کہ مریم بی بی اورراناثنااللہ پی ٹی آئی کیلئے اللہ کا تحفہ ہیں کیونکہ یہ عمران خان کا قد بڑھا رہے ہیں۔
تفصیلات کے مطابق ماہر قانون اعتراز احسن نے ہائیکورٹ میں میڈیا سے گفتگو کرتے ہوئے کہا کہ مریم بی بی اورراناثنااللہ پی ٹی آئی کیلئے اللہ کا تحفہ ہیں، یہ عمران خان کا قد بڑھا رہے ہیں، ان کےکہنے پر کوئی جماعت دہشت گرد نہیں ہوگی۔
اعتراز احسن کا کہنا تھا کہ الیکشن سپریم کورٹ کی مقرر کردہ تاریخوں میں ہوں گے ، گورنر کے پاس کوئی نظر ثانی کا اختیار نہیں۔
انھوں نے کہا کہ یہ کسی کی بھول ہے کہ 30 اپریل کو الیکشن نہیں ہوگا، آئین اور قانون کے اندر یہ لکھا ہوا ہے۔
ماہر قانون کا کہنا تھا کہ راناثنااللہ سیکیورٹی کیلئے رینجرز اوراسحاق ڈار رقم دیں گے، سپریم کورٹ کےحکم کو کوئی نہیں ٹال سکتا۔
اعتراز احسن نے مزید کہا کہ کہ صدر مملکت اور دیگر کے فون ٹیپ ہورہے ہیں، ماضی میں فون ٹیپ کرنے پر اسمبلیاں ختم ہوئی تھیں، فون ٹیپ کرنا اچھی بات نہیں ہے۔
ان کا کہنا تھا کہ ہمیں ججز اور سیاستدانوں کے لیے دعا کرنا چاہیے، میں مریم نواز کے لیے دعا کرتا ہوں۔
