لاہور : بین الصوبائی سرحدی علاقے سے دہشت گردوں کی پنجاب میں داخلےکی کوشش ناکام بنادی گئی ، پولیس جوانوں نے بھرپور فائرنگ سے دہشت گردوں کو بھاگنے پرمجبور کر دیا۔
تفصیلات کے مطابق ڈیرہ غازی خان میں بین الصوبائی سرحدی علاقے سے دہشت گردوں کی پنجاب میں داخلے کی کوشش ناکام بنادی گئی۔
آئی جی پنجاب ڈاکٹرعثمان انور نے ویڈیو پیغام میں بتایا کہ ڈی جی خان کی چیک پوسٹ پر دہشت گردوں کا حملہ ناکام بنادیا گیا ہے ، ڈی جی خان کی سرحدی چوکی جھنگی پر کالعدم تنظیم کے آٹھ سے دس دہشت گردوں نے رات گئے حملہ کیا تو پولیس اہلکاروں نے دہشت گردوں کو بھرپورجواب دیا۔
ڈاکٹرعثمان انور کا کہنا تھا کہ چوکی پر موجود جوانوں نےجدید کیمروں کی مدد سے دہشت گردوں کی نشاندہی کی اور پولیس اہلکاروں نے فائرنگ کرکے دہشت گردوں کو بھاگنے پر مجبورکر دیا۔
آئی جی پنجاب نے مزید کہا کہ ایس ایچ او وہوا کی قیادت میں دوسری ٹیم بھی بیک اپ کیلئےفوری پہنچی،تمام سرحدی چوکیوں پر پولیس ٹیمیں ہائی الرٹ اورفرائض ادا کر رہی ہے، دہشت گردوں کا ہر حملہ ناکام بنایا جائے گا۔
