شوبز انڈسٹری کے نامور اداکار بلال قریشی نے کامیاب ازدواجی زندگی سے متعلق بتا دیا۔
اداکار بلال قریشی نے حال ہی میں ایک پوڈ کاسٹ میں شرکت کی جس میں میزبان نے ان سے کامیاب ازدواجی زندگی سے متعلق پوچھا۔
بلال قریشی نے کہا کہ شادی ایک فٹبال میچ کی طرح ہوتی ہے جس طرح ٹیم آدھے وقت میں ایک طرف اور آدھے وقت میں دوسری طرف ہوتی ہے بالکل اسی طرح بیچلر لائف بھی آپ کے ہاف ٹائم کی طرح ہے جس کے بعد شادی شدہ زندگی دوسرے حصے کے طور پر شروع ہوتی ہے۔
بلال قریشی نے کہا کہ جب ہم پیدا ہوتے ہیں تو ہمیں ہر چیز مل رہی ہوتی ہے، ایک بچہ چھوٹا ہے اسے بھوک لگی ہے تو کھانا، دودھ دیا جاتا ہے، کھیلنے کے لیے کھلونے بھی دیے جاتے ہیں اس دوران آپ چیزیں حاصل کرکے بڑے ہورہے ہوتے ہیں۔
اداکار نے نوجوانوں کو مخاطب کرتے ہوئے کہا کہ لیکن شادی وہ اسٹیج ہے جس کے بعد آپ کو تحفے تحائف ملتے نہیں ہیں بلکہ آپ کو دینے ہوتے ہیں۔
بلال قریشی نے کہا کہ اگر آپ رشتوں کو نبھانا جانتے ہیں تو تب شادی کریں اگر آپ اس زون میں ہیں کہ مجھے کچھ دیا جائے تو آپ دماغی طور پر شادی کے لیے تیار نہیں ہیں۔
انہوں نے کہا کہ بچوں کی پیدائش کے بعد زندگی بالکل تبدیل ہوجاتی ہے اور آپ کی ذمہ داریاں بڑھ جاتی ہیں۔
بلال قریشی نے کہا کہ کائنات سب سے پہلا اور مکمل رشتہ شادی ہے، سب سے پیارا رشتہ بھی شادی ہے اگر آپ اس کو دل سے قبول کریں اور محبت سے اسے نبھائیں۔
واضح رہے کہ بلال قریشی نے سال 2015 میں اداکارہ عروسہ سے شادی کی تھی اور اس جوڑی کے دو بیٹے سوہان اور روہان ہیں۔
