بیلجیئم میں گرفتار ہونے والا ایک ملزم تھوڑی دیر بعد ہی جیل کا ٹوائلٹ توڑ کر فرار ہوگیا، قیدی قانون نافذ کرنے والے اداروں پر حملوں میں ملوث تھا۔
بین الاقوامی ویب سائٹ کے مطابق بیلجیئم کے شہر برسلز میں 25 سالہ شخص گرفتاری کے چند گھنٹے بعد ہی جیل سے فرار ہونے میں کامیاب ہوگیا، اس نے دیوار کے ساتھ نصب ٹوائلٹ توڑا اور سیوریج کا سورخ بڑا کر کے فرار ہو گیا۔
برسلز پولیس کے ترجمان کا کہنا ہے کہ مفرور ملزم نے سیوریج ہول کو توڑ کر صرف اتنا ہی سوراخ بڑا کیا، جتنا کہ اے فور سائز کا پیپر ہوتا ہے۔
ترجمان کے مطابق اس سوراخ کے ذریعے اس قیدی نے جیل میں موجود زیر زمین راہداری تک رسائی حاصل کی، جہاں وہ ایک کھڑکی سے باہر سڑک تک پہنچنے میں کامیاب ہوگیا۔
اس واقعے کے وقت حراستی سیل میں موجود سیکیورٹی کیمرے کام نہیں کر رہے تھے۔
مشتبہ شخص قانون نافذ کرنے والے اداروں پر حملوں اور منشیات سے متعلق الزامات میں ویسٹ فلینڈرز پراسیکیوٹر کے دفتر کو مطلوب تھا۔
اس شخص کو پولیس کے سامنے پیش ہونے کے حکم کی خلاف ورزی کرنے کے الزام میں رواں ہفتے پیر کے روز گرفتار کیا گیا تھا، جس کے چند گھنٹے بعد ہی وہ جیل سے فرار ہونے میں کامیاب ہوگیا۔
