کراچی : یونیورسٹی روڈ ڈکیتی مزاحمت پر این ای ڈی یونیورسٹی کے طالب علم کے قتل کا مقدمہ درج کرلیا گیا اور مقتول کی نمازجنازہ ادا کردی گئی۔
تفصیلات کے مطابق کراچی میں یونیورسٹی روڈ پر این ای ڈی یونیورسٹی کے طالبعلم بلال کی ڈکیتی مزاحمت پر موت کا مقدمہ درج کرلیا گیا ، مقدمہ سرکاری مدعیت میں مبینہ ٹاؤن تھانے میں درج کیا گیا۔
پولیس کا کہنا ہے کہ مقدمےمیں قتل اور دیگر دفعات شامل کی گئیں ہیں اور 2 نامعلوم ملزمان کو نامزد کیا گیا ہے۔
دوسری جانب کراچی میں یونیورسٹی روڈ پر ڈکیتی کی مزاحمت پرقتل ہونے والے طالبعلم بلال کی نماز جنازہ ایف بی ایریا کی جامعہ مسجد اقصی میں ادا کردی گئی اور مقتول کوسخی حسن قبرستان میں سپردخاک کیا گیا۔
خیال رہے پولیس نے این ای ڈی یونیورسٹی کے طالب علم کو دوران ڈکیتی مزاحمت پر قتل کرنے والے ملز م نظام کو گرفتار کرنے کا دعویٰ کیا ہے۔
پولیس کا کہنا ہے کہ این ای ڈی یونیورسٹی کے طالبعلم بلال کے قتل میں ملوث ملزم نظام کو سپر ہائی وے کے قریب گوٹھ سے گرفتار کیاگیا جبکہ دوسرے ملزم کی نشاندہی بھی ہوچکی جلد گرفتار کریں گے۔
گذشتہ روز کراچی میں ڈاکوؤں نے این ای ڈی یونیورسٹی گیٹ کے قریب ہوٹل پر لوٹ مار کی ، اکیس سالہ بلال ہوٹل پردوستوں کےساتھ چائے پی رہا تھا۔
موبائل فون چھیننے کی کوشش پر این ای ڈی میں پٹرولیم انجینئرنگ کے تھرڈ سمیسٹر کے طالبعلم نے مزاحمت کی اور ڈاکو پرقابو پالیا لیکن ڈاکو نے انتہائی قریب سے گولی چلادی، بلال کوسینے اور پاؤں پرگولی لگی، جس سے وہ موقع پر ہی جاں بحق ہوگیا۔
بلال کے بھائی کا کہنا تھا کوئی تحفظ نہیں،موبائل فون کی خاطر قیامت ڈھا دی گئی۔
