لاہور : پنجاب کے سابق وزیراعلیٰ اور پی ٹی آئی کے رہنما چوہدری پرویزالہٰی کیخلاف اربوں روپے کی بدعنوانی کی تحقیقات کی جارہی ہیں۔
اس حوالے سے ذرائع کا کہنا ہے کہ پرویزالہٰی پر 23ارب مالیت کے 226 ٹھیکوں میں کرپشن و کک بیکس وصولی کا الزام ہے۔
ذرائع نے بتایا ہے کہ پرویزالہٰی نے اپنے فرنٹ مینوں کے ذریعے سوا ارب کرپشن و کک بیکس کی مد میں وصول کیے۔
ملزمان نے من پسند ٹھیکیداروں کو نوازنے کیلئے 226 ٹھیکے منظور کرائے، وزیر اعلیٰ آفس سے وزارت مواصلات کو184 سمریوں کی منظوری کیلئے براہ راست احکامات دیئے گئے۔
ذرائع کے مطابق محکمہ مواصلات و دیگر اعلیٰ حکام کیخلاف تحقیقات کیلئے اعلیٰ سطح نیب کی تحقیقاتی ٹیم کام کر رہی ہے۔
اس کے علاوہ قومی احتساب بیورو (نیب) لاہور مونس الہٰی، سی اینڈ ڈبلیو کے افسران کیخلاف بھی کرپشن کی تحقیقات کررہا ہے۔
ذرائع کا کہنا ہے کہ سیکریٹری سہیل اصغر اعوان، سی اینڈ ڈبلیو کے 2 ایس ڈی اوز ،سب انجینئر بھی گرفتار ہیں۔
نیب لاہور کی ٹیم دیگر ملوث ملزمان کی گرفتاری کیلئے بھی چھاپے مار رہی ہے، نیب لاہور کی جانب سے دیگر ملزمان کی جلد گرفتاری کا امکان ہے۔
