بھارت کے شہر چنئی میں سفاک شخص نے چلتی ٹرین کے آگے بی کام کی طالبہ کو دھکا دے کر موت کے گھاٹ اتار دیا۔
بھارتی میڈیا کے مطابق واقعہ 13 اکتوبر بروز جمعرات سینٹ تھامس ماؤنٹ اسٹیشن پر پیش آیا جہاں چلتی ٹرین کے سامنے ملزم نے 20 سالہ طالبہ کو دھکا دے کر اس کی جان لے لی۔
مقتولہ پرائیویٹ کالج میں بی کام پارٹ ٹو کی طالبہ تھی اور جس شخص نے اسے مبینہ طور پر دھکا دیا اس کی شناخت 23 سالہ ستیش کے طور پر کی گئی ہے جو مفرور ہے۔
پولیس کے مطابق ستھیا ٹرین کا انتظار کر رہی تھی جب ستیش اس کے قریب پہنچا اور اس کے ساتھ جھگڑا کرنے لگا اور ستیش نے مبینہ طور پر اسے پٹری پر دھکیل دیا۔
ستھیا کی لاش پہیوں کے نیچے آگئی اور وہ موقع پر ہی دم توڑ گئی، جس کے بعد ستیش اسٹیشن سے بھاگ گیا۔ قتل کے مقام پر پہنچ کر ریلوے پولیس نے ستھیا کی لاش کو پٹریوں سے نکالا اور پوسٹ مارٹم کے لیے بھیج دیا۔
