ریاض: سعودی عرب کے شاہ سلمان بن عبدالعزیز کی خصوصی دعوت پر چینی صدر آج سفارتی و تجارتی تعلقات کو مستحکم کرنے کے لیے ریاض پہنچیں گے، دونوں ممالک کے درمیان 110 ارب ریال کے معاہدے ہوں گے۔
عرب نیوز کے مطابق چینی صدر شی جن پنگ آج بدھ کو تین روزہ دورے پر مملکتِ سعودی عرب پہنچ رہے ہیں، جس کے دوران وہ سعودی اور عرب رہنماؤں سے ملاقاتیں کریں گے۔
چینی صدر کے دورے کے دوران 3 سربراہی اجلاس منعقد ہوں گے، جن میں سعودی چینی سربراہی اجلاس، ریاض خلیج چین سربراہی اجلاس برائے تعاون اور ترقی، اور ریاض عرب چین سربراہی اجلاس برائے تعاون اور ترقی شامل ہیں۔
سعودی پریس ایجنسی کے مطابق، شرکا میں دونوں ممالک اور بین الاقوامی تنظیموں کے 30 سے زائد رہنما اور عہدے دار شامل ہوں گے، جو اجتماعات کی اہمیت اور ان کے اعلیٰ علاقائی اور بین الاقوامی پروفائل کو اجاگر کریں گے۔
دونوں ممالک کے درمیان 20 سے زائد ابتدائی معاہدوں پر، جن کی مالیت 110 ارب ریال (29.3 ارب ڈالر) سے زیادہ ہے، ایک اسٹریٹجک پارٹنرشپ ڈیل کے ساتھ دستخط کیے جائیں گے، سعودی عرب کے وژن 2030 کی ترقی اور تنوع کے منصوبے کو چین کے بیلٹ اینڈ روڈ انیشیٹو کے ساتھ ہم آہنگ کرنے کے ایک منصوبے پر بھی دستخط ہوں گے۔
