ٹیکساس : امریکی ریاست ٹیکساس کے گرجا گھر میں فائرنگ کے ہولناک واقعے کے بعد گرجا گھر کی سیکورٹی بڑھانے اور پادریوں کو ہتھیار چلانے کی تربیت دینا کافیصلہ کرلیا گیا ہے۔
تفصیلات کے مطابق ٹیکساس کے چرچ میں فائرنگ کے ایک اور ہولناک واقعے کے بعد گرجا گھروں کی سیکورٹی بڑھانے کا فیصلہ کر لیا گیا ہے، امریکہ کے بڑے شہروں سمیت اب ٹاؤنز اور دیہات کی سطح پر گرجا گھروں کے اماموں کو ہتھیار چلانے کی بھی تربیت دی جارہی ہے
ٹیکساس کے واقعے سے پہلے بھی امریکہ میں گرجا گھروں میں فائرنگ کے کئی واقعات رونما ہوچکے ہیں، اب تمام ٹاؤنز میں مقامی افراد ہی رضا کارانہ طور پرسیکورٹی گارڈز کے فرائض انجام دیں گے جبکہ بڑے شہروں میں پولیس اہلکاروں کی تعداد کے ساتھ سیکورٹی کے مزید کئی اقدامات اٹھائے جارہے ہیں۔
مزید پڑھیں : امریکی ریاست ٹیکساس کے چرچ میں فائرنگ‘ 27 افراد ہلاک
یاد رہے کہ گزشتہ دنوں سدر لینڈ میں ایک شخص نے چرچ میں فائرنگ کر کے پچیس افراد کو ہلاک کر دیا تھا، حملہ آور کو مقامی شخص نے فائرنگ کے تبادلے کے بعد ہلا ک کر دیا تھا۔
واقعہ اس وقت پیش آیا جب وہاں عبادات کی جا رہی تھیں۔
امریکی صدرٹرمپ نے ٹیکساس چرچ پر حملہ کرنے والے کو ذہنی مریض قرار دیا تھا۔
