اسلام آباد: سپریم کورٹ آف پاکستان میں چیف جسٹس پاکستان جسٹس عمر عطا بندیال کا بینچ اچانک ڈی لسٹ کر دیا گیا، ذرائع کا کہنا ہے کہ چیف جسٹس کا بینچ خرابی صحت کے باعث ڈی لسٹ ہوا۔
تفصیلات کے مطابق سپریم کورٹ آف پاکستان میں چیف جسٹس پاکستان جسٹس عمر عطا بندیال کا بینچ اچانک ڈی لسٹ کر دیا گیا، بینچ کے سامنے سماعت کے لیے مقرر تمام مقدمات بھی ڈی لسٹ کردیے گئے۔
رجسٹرار سپریم کورٹ نے مقدمات ڈی لسٹ ہونے کا نوٹیفکیشن جاری کردیا۔
چیف جسٹس پاکستان کے بینچ میں جسٹس جمال مندوخیل اور جسٹس اطہر من اللہ بھی شامل تھے۔
بینچ کے سامنے آج 12 مقدمات سماعت کے لیے مقرر کیے گئے تھے، سپریم کورٹ کے بینچ نمبر 2 کے مقدمات کی فہرست بھی منسوخ کردی گئی۔
جسٹس سردار طارق مسعود اور جسٹس شاہد وحید پر مشتمل بینچ کی کاز لسٹ بھی منسوخ کردی گئی ہے۔
بینچ نمبر 2 کے مقدمات کی سماعت کے لیے جسٹس اعجاز الاحسن اور جسٹس امین الدین خان پر مشتمل نیا بینچ تشکیل دے دیا گیا ہے، سپریم کورٹ کے رجسٹرار آفس نے نئے بینچ نمبر 2 کے مقدمات کی فہرست جاری کردی۔
دوسری جانب ذرائع کا کہنا ہے کہ چیف جسٹس کا بینچ خرابی صحت کے باعث ڈی لسٹ ہوا، چیف جسٹس بخار، جسم درد اور فلو میں مبتلا ہیں۔
ذرائع کے مطابق چیف جسٹس گزشتہ روز اپنے گاؤں میں تھے، چیف جسٹس صحت یاب ہونے پر دوبارہ مقدمات کی سماعت کریں گے۔
