دنیا بھر میں بے شمار ممالک کو اس وقت بدلتے موسم، قدرتی آفات کی تباہ کاریوں کا سامنا ہے، یہ وہ مسائل ہیں جو بلا تفریق رنگ و نسل اور ملک و قوم کرہ ارض کو اپنی لپیٹ میں لیے ہوئے ہیں۔
اس پر قابو پانے کیلئے عالمی سطح پر مختلف منصوبوں پر کام جاری ہے اور اس حوالے سے پاکستان سے بھی مطالبہ کیا جارہا ہے کہ وہ بھی اس کام میں اپنا کردار ادا کرے۔
اے آر وائی نیوز کے پروگرام باخبر سویرا میں ماہر ماحولیات ڈاکٹر پرویز امیر نے گفتگو کرتے ہوئے موسمیاتی تبدیلی اس اہم مسئلے پر ہوشربا انکشافات کیے۔
انہوں نے بتایا کہ دنیا بھر میں موسمیاتی تبدیلی سے متاثرہ دس بڑے ممالک میں پاکستان کا پانچواں نمبر ہے، کلائمٹ چینج سے نمٹنے کیلئے پاکستان کو 350 ارب ڈالر درکار ہیں لہٰذا ہم خود ایک مقروض ملک ہیں ہم اس کیلئے کوئی کردار ادا نہیں کرسکتے۔
ان کا کہنا تھا کہ آنے والے برسوں میں موسمیاتی اور ماحولیاتی تبدیلیوں کی وجہ سے درجہ حرارت بہت زیادہ بڑھ جائے گا، بہت سے خطوں میں بارشیں پچاس فیصد تک بڑھ جائیں گی جن سے خطرناک سیلاب آئیں گے اگر ان سے بچاؤ کیلئے اقدامات نہ کیے گئے تو بہت بڑے نقصانات کا خدشہ ہے جس سے خطے کے کروڑوں افراد متاثرہوں گے۔
ان کا مزید کہنا تھا کہ مستقبل میں اگر مؤثر انداز میں واٹر منیجمنٹ کی جائے گی اور سیلابوں کا پانی ذخیرہ کر لینے کی موثر صلاحیت ہو گی تو سندھ میں بھی ڈاؤن اسٹریم پر سارا سال مناسب بہاؤ کو مؤثر طور پر مینیج کیا جاسکتا ہے، اس کیلئے ہمیں نئے ڈیمز کی اشد کی ضرورت ہے۔
