کراچی: جماعت اسلامی نے ’بلدیاتی الیکشن مکمل کراؤ تحریک‘ شروع کرنے کا اعلان کر دیا۔
تفصیلات کے مطابق امیر جماعت اسلامی کراچی حافظ نعیم الرحمان نے کہا ہے کہ وہ ’بلدیاتی الیکشن مکمل کراؤ تحریک‘ شروع کر رہے ہیں۔
حافظ نعیم الرحمان نے کہا ’’19 فروری کو ایم اے جناح روڈ پر بڑا مارچ کریں گے، ہمارے پاس ٹرین مارچ کا آپشن بھی موجود ہے۔‘‘
انھوں نے کہا کہ اکتیس دن ہو گئے ہیں، الیکشن کمیشن نے گیارہ یوسیز کے شیڈول کا اعلان تک نہیں کیا، اگر سندھ الیکشن کمیشن نے سمری بنا کر بھیج دی ہے تو وفاقی الیکشن کمیشن اعلان کیوں نہیں کر رہا ہے۔
امیر جماعت اسلامی کراچی نے پریس کانفرنس میں کہا کہ ہمیں ریڈ لائن پروجیکٹ پر تحفظات ہیں، ریڈ لائن بن بھی گئی تو ٹریفک کا بہت بڑا مسئلہ رہے گا، 120 ارب لاگت سے پروجیکٹ شروع ہونا تھا جو 150 ارب تک چلا گیا ہے۔
حافظ نعیم الرحمان نے کراچی کے ایک اور اہم ترین مسئلے کی نشان دہی کی، اور کہا کہ ساڑھے 3 کروڑ آبادی کا شہر 2 یونیورسٹیوں پر چل رہا ہے، ایک جامعہ کراچی، جس میں تقریباً 46 ہزار طلبہ ہیں، اور دوسری وفاقی اردو یونیورسٹی، انھوں نے کہا کہ وفاقی اردو یونیورسٹی میں 10 سال سے وائس چانسلر بھی نہیں ہے۔
حافظ نعیم نے ایم کیو ایم کو تنقید کا نشانہ بنایا اور کہا کہ نواز شریف، عمران خان اور آصف زرداری اور ہر حکومت میں شامل ایم کیو ایم جواب دے کہ ان ساری جماعتوں نے کے الیکٹرک کے خلاف ایکشن کیوں نہیں لیا، بتائیں کراچی کے ساتھ یہ سلوک کیوں کرتے ہو۔
