کراچی : شہریوں کو اغواء برائے تاوان سے بچانے والا محکمہ خود اغواء کی وارداتوں میں ملوث نکلا، جرائم پیشہ ڈی ایس پی کو دیگر اہلکاروں سمیت گرفتار کرلیا گیا۔
اس حوالے سے پولیس حکام نے بتایا کہ اینٹی وائلنٹ کرائم سیل کا ڈی ایس پی قلیل مدتی اغواء کی وارداتوں میں ملوث ہے، ڈی ایس پی فہیم احمد کیخلاف سعودآباد میں شہری کے اغواء کی شکایت ملی تھی۔
ذرائع کے مطابق ایڈیشنل آئی جی کراچی نے ڈی ایس پی فہیم احمد اور اس کی ٹیم کو معطل کردیا، ملزم اور اس کے عملے نے سعودآباد میں قلیل مدتی اغواء کی واردات کی۔
ایڈیشنل آئی جی کراچی نے اے وی سی سی افسران و ملازمین کو فوری طور پر معطل کرکے ان کیخلاف تحقیقات کے احکامات جاری کردیے۔
ذرائع کا کہنا ہے کہ معطل ہونے والوں میں اے وی سی سی کا کانسٹیبل جان شیر، کانسٹیبل غلام مصطفیٰ اور کانسٹیبل عامر شامل ہیں۔
کراچی پولیس چیف جاویدعالم اوڈھو نے کہا کہ پولیس کا کام عوام کا تحفظ اور قانونی مدد کی فراہمی ہے جو افسران قانون کیخلاف کام کریں گے ان کیخلاف سخت ایکشن ہوگا۔
واضح رہے کہ گزشتہ سال بھی ملزم ڈی ایس پی فہیم احمد کیخلاف سچل میں مقدمہ درج ہوا تھا۔ فہیم احمد ماضی میں بھی حیدرآباد کے شاپنگ مارٹ میں چوری کرتے پکڑا گیا تھا۔
