ملک بھر میں آج عید الفطر مذہبی عقیدت و احترام سے منائی جا رہی ہے۔
ملک کے تمام چھوٹے بڑے شہروں، قصبوں اور دیہات کی مساجد اور کھلے مقامات پر نماز عید کے اجتماعات منعقد ہوئے، جن میں ملکی سلامتی، ترقی اور خوش حالی کے لیے خصوصی دعائیں مانگی گئیں، اے آر وائی نیٹ ورک کی طرف سے بھی اہل وطن کو عید مبارک۔
سیاسی رہنما بھی اپنے آبائی شہروں میں عید منا رہے ہیں، صدر مملکت آصف زرداری نوابشاہ، وزیر اعظم شہباز شریف لاہور میں عید منا رہے ہیں، بلاول بھٹو زرداری نے گڑھی خدا بخش بھٹو میں نماز عید ادا کی، وفاقی وزرا خواجہ آصف سیالکوٹ، احسن اقبال نارووال اور محسن نقوی لاہور میں عید منا رہے ہیں۔
چیئرمین سینیٹ یوسف رضا گیلانی نے ملتان میں نمازعید ادا کی، نو منتخب امیر جماعت اسلامی حافظ نعیم الرحمان کراچی میں اور پی ٹی آئی کے سربراہ بیرسٹر گوہر ضلع بونیر میں اپنے گاؤں میں عید منا رہے ہیں۔
صدر آصف علی زرداری اور وزیر اعظم شہباز شریف نے پاکستانی قوم اور امت مسلمہ کو عید الفطر کی مبارک باد دی ہے، صدر مملکت نے کہا دعا گو ہوں کہ یہ دن ڈھیروں برکتیں، خوشیاں، امن اور سلامتی لائے، پاکستانی قوم فلسطین کے مظلوم عوام کے ساتھ یکجہتی کا اظہار کرتی ہے، عالمی برادری غزہ میں فوری جنگ بندی اور امداد کی فراہمی یقینی بنائے۔
وزیر اعظم شہباز شریف کا کہنا تھا عید کے موقع پر وطن کی ترقی کے لیے کردار ادا کرنے کا عہد کریں، ایسے لوگوں کو ضرور یاد رکھیں جن کے پاس وسائل نہیں، کشمیری، فلسطینی بھائیوں کو خاص طور پر یاد رکھنا چاہیے۔
