بالی ووڈ کی معروف اداکارہ ایشا دیول سابق شوہر بھرت تختانی سے طلاق کے بعد پہلی بار میڈیا کے سامنے آگئیں۔
رواں سال 6 فروری کو ایشا دیول اور ان کے شوہر بھرت تختانی نے اپنی طلاق کا اعلان کیا تھا، ایشا دیول نے سال 2012 میں بھرت تختانی سے شادی کی تھی، اس جوڑی کی دو بیٹیاں ہیں۔
بھارتی میڈیا کا دعویٰ تھا کہ ہیما مالنی اپنی بیٹی کی طلاق کے فیصلے کی حمایت کررہی ہیں لیکن وہ اس معاملے پر میڈیا سے بات نہیں کرنا چاہتیں جبکہ ایشا دیول کے والد دھرمیندر اپنی بیٹی کی طلاق کی وجہ سے بہت اداس ہیں۔
تاہم ایشا دیول کو آج صبح ممبئی ایئرپورٹ پر دیکھا گیا، اس موقع پر ان کے ساتھ ان کی دونوں بیٹیاں موجود نہیں تھیں بلکہ وہ اکیلے ہی ممبئی سے پرواز لے کر دوسرے شہر جارہی تھیں۔
ایئرپورٹ پر فوٹوگرافرز نے ایشا دیول کی تصاویر اور ویڈیوز بنائیں اور اداکارہ پراعتماد انداز میں کیمرے کے سامنے پوز دیتے ہوئے نظر آئیں۔
بھارتی صحافی نے ایشا دیول سے ان کی خیریت دریافت کی جس پر اداکارہ نے کہا کہ میں بالکل ٹھیک ہوں، آپ سب کیسے ہیں۔
