کوک اسٹوڈیو سیزن 14 کے مقبول بلوچ زبان کے گانے کنا یاری سے مقبولیت حاصل کرنے والی گلوکارہ ایوا بی کو ایک اور اعزاز مل گیا، ان کی تصویر امریکا کے معروف ٹائمز اسکوائر پر آویزاں کردی گئی۔
پاکستان کی پہلی باحجاب ریپر اور بلوچ گلوکارہ ایوا بی کو خراج عقیدت پیش کرتے ہوئے میوزک اسٹریمنگ ویب سائٹ اسپاٹی فائے نے ان کی تصویر امریکا کے معروف ٹائمز اسکوائر پر آویزاں کردی۔
View this post on Instagram
ایوا بی سے قبل اسپاٹی فائے 7 پاکستانی خواتین گلوکاراؤں کی تصاویر بھی ٹائمز اسکوائر پر آویزاں کر چکی ہے۔
اسپاٹی فائے نے رواں برس مارچ سے اکوئل پاکستان نامی منصوبے کا آغاز کیا تھا، جس کے تحت ہر ماہ ایک پاکستانی گلوکارہ کی تصویر کو ٹائمز اسکوائر پر آویزاں کیا جا رہا ہے۔
اس منصوبے کے تحت پہلی بار مارچ 2022 میں ٹائمز اسکوائر پر پاکستانی نژاد امریکی گلوکارہ عروج آفتاب کی تصویر آویزاں کی گئی تھی۔
اسی منصوبے کے تحت گزشتہ ماہ ستمبر میں گلوکارہ مومنہ مستحسن کی تصویر کو ٹائمز اسکوائر پر آویزاں کیا گیا تھا جبکہ اب ایوا بی کی تصویر کو آویزاں کیا گیا ہے۔
ایوا بی کی تصویر ٹائمز اسکوائر پر آویزاں ہونے پر گلوکاروں سمیت شوبز شخصیات نے بھی انہیں مبارک باد پیش کی جب کہ خود انہوں نے اپنی تصویر کو آویزاں کیے جانے کو تاریخی لمحہ قرار دیا۔
ایوا بی پاکستان کی پہلی باحجاب اور بلوچی گلوکارہ بن گئیں، جن کی تصویر کو ٹائمز اسکوائر پر آویزاں کیا گیا ہے۔
ایوا بی کو رواں برس کے آغاز میں ریلیز ہونے والے کوک اسٹوڈیو سیزن 14 کے گانے کنا یاری کو ملک بھر میں بہت پسند کیا گیا تھا اور وہ مذکورہ گانے کی وجہ سے عالمی سطح پر بھی مشہور ہوئی تھیں۔
View this post on Instagram
تاہم ایوا بی نے گلوکاری کا آغاز پہلے ہی کردیا تھا، انہوں نے 3 سال قبل 2018 میں انسٹا گرام پراپنا پہلا ریپ گانا شیئر کیا تھا، جسے کافی سراہا گیا تھا۔
View this post on Instagram