ریاض: سعودی حکام نے اس بات کی تردید کی ہے کہ خروج و عودہ کی خلاف ورزی کرنے کے بعد مملکت آنے پر پابندی کا سامنا کرنے والے افراد پر، دیگر خلیجی ممالک میں بھی داخلے پر پابندی عائد ہوتی ہے۔
اردو نیوز کے مطابق خروج وعودہ کی خلاف ورزی کے حوالے سے ایک شخص نے دریافت کیا کہ جو غیر ملکی خروج و عودہ کی خلاف ورزی کے مرتکب ہوتے ہیں ان پر 3 برس کی پابندی صرف سعودی عرب کے لیے ہے یا خلیجی ممالک جانے کے لیے بھی؟
جس کے جواب میں جوازات کا کہنا تھا کہ خروج و عودہ قانون کی خلاف ورزی پر عائد کی جانے والی پابندی صرف سعودی عرب کے لیے ہے۔
ایسے افراد جو خروج و عودہ پر جانے کے بعد مقررہ وقت پر واپس نہیں آتے انہیں مملکت میں 3 برس کے لیے بلیک لسٹ کر دیا جاتا ہے، ایسے افراد صرف اپنے سابق کفیل کی جانب سے جاری کردہ نئے ویزے پر ہی سعودی عرب آسکتے ہیں۔
ضوابط کے حوالے سے سوال پر جوازات کا کہنا تھا کہ خروج و عودہ کی خلاف ورزی جن پر رجسٹرڈ ہوتی ہے وہ صرف سعودی عرب کے لیے ہی 3 برس کے لیے بلیک لسٹ کیے جاتے ہیں۔
