اسلام آباد : فری اینڈ فیئر الیکشن نیٹ ورک (فافن) نے ریٹرننگ افسران سے کاغذات نامزدگی مسترد کرنے کے فیصلے جاری کرنے کا مطالبہ کردیا۔
تفصیلات کے مطابق فری اینڈ فیئر الیکشن نیٹ ورک (فافن) کی جانب سے مطالبہ کیا گیا ہے کہ کاغذات مسترد کرنے کے فیصلے جاری کیے جائیں اور آراوز کسی بھی امیدوار کے کاغذات مسترد کرنے کا فیصلہ جاری کریں۔
فافن کا کہنا تھا کہ تفصیلی فیصلوں کا اجرا کاغذات مسترد کرنے وجوہات جاننے کے لیے ضروری ہیں، ضوابط کے خلاف کاغذات مسترد ہونے پر الیکشن کمیشن اختیارات استعمال کرے، ضابطہ اخلاق کی خلاف ورزی پر الیکشن کمیشن متعلقہ افسرکےخلاف کاروائی کرسکتاہے۔
فری اینڈ فیئر الیکشن نیٹ ورک کی جانب سے کہا گیا کہ الیکشن ایکٹ 2017 کے تحت آر اوز فیصلے جاری کرنے کے پابند ہیں، الیکشن 2024 کے لیے کاغذات نامزدگی مسترد ہونے کی شرح 12.4 فیصد رہی۔
فافن نے بتایا کہ الیکشن 2018 کے لیے کاغذات نامزدگی مسترد ہونے کی شرح 10.4 فیصد اور الیکشن 2013 کے لیے کاغذات نامزدگی مسترد ہونے کی شرح14.6 فیصد تھی۔
