قومی کرکٹ ٹیم کے اوپنر فخر زمان کا کہنا ہے کہ ناکامی دباؤ بڑھانے کا باعث بنتی ہے، ہماری ٹیم مشکل وقت میں اچھا کھیلتی ہے۔
بنگلہ دیش کے خلاف میچ سے قبل ذرائع ابلاغ سے بات چیت کرتے ہوئے پاکستانی کرکٹر نے کہا کہ ورلڈکپ کے میچز میں ہماری ٹیم غلطیاں زیادہ کر رہی ہے۔ ہماری ٹیم کا ماضی کچھ اس طرح کا رہا ہے کہ مشکل وقت میں اچھا کھیلتے ہیں۔
گھٹنے کی انجری کے حوالے سے فخر نے کہا کہ یہ انجری لمبی چلتی ہے لیکن میڈیکل پینل کی محنت سے جلد فٹ ہوگیا۔ گھٹنے میں درد ہے لیکن پرانی والی انجری نہیں ہے۔
کولکتہ میں میڈیا سے گفتگو میں انکا کہنا تھا کہ ٹیم نے محنت میں کمی نہیں کی، کھلاڑی خاصی محنت کر رہے ہیں۔ تینوں میچز جیتنے کی کوشش کریں گے۔
فخرزمان نے کہا کہ ہارنے کی وجہ سے کھلاڑی کافی دکھی ہیں۔ میچز میں ہماری ٹیم غلطیاں زیادہ کر رہی ہے، ناکامیوں سے دباؤ بھی بڑھ جاتا ہے لیکن ٹیم متحد ہے۔ بھارت کی کنڈیشنز بیٹرز کےلیے بہت سازگار ہیں۔
شاہین اور حارث کے حوالے سے پاکستانی اوپنر نے کہا کہ دنوں خود بہتر بتا سکتے ہیں انکے ذہن میں کیا چل رہا ہے۔ شاہین اور حارث ہمیشہ اچھی کارکردگی دکھانے کے حوالے سے گفتگو کرتے ہیں۔
