لاہور کے قذافی اسٹیڈیم میں کھیلے گئے چوتھے T20 انٹرنیشنل میچ میں پاکستان کو آخری گیند پر 4 رنز سے شکست کا سامنا کرنا پڑا۔ اس فتح کے ساتھ ہی نیوزی لینڈ نے پانچ میچوں کی سیریز میں 2-1 کی برتری حاصل کر لی ہے۔
آخری گیند پر اس شکست کے بعد اسٹیڈیم میں بیٹھے ایک معصوم مداح کی رونے کی ویڈیو سوشل میڈیا پر وائرل ہورہی ہے۔ جبکہ قومی ٹیم کی کارکردگی پر تنقید کا سلسلہ بھی جاری ہے۔
قذافی اسٹیڈیم میں کھیلے گئے چوتھے ٹی20 میچ میں پاکستان نے ٹاس جیت کر بولنگ کا فیصلہ کیا، مہمان نیوزی لینڈ نے پہلے بیٹنگ کرتے ہوئے مقررہ 20 اوور میں 7 وکٹوں کے نقصان پر 178 رنز بنائے۔
نیوزی لینڈ کے ٹم رابنسن 51 اور ڈین فوکس کرافٹ 34 رنز بناکر نمایاں رہے جبکہ ٹام بلینڈل نے 28 اور مائیکل بریسویل نے 27 رنز بنائے، جوش کلارکسن صفر پر آؤٹ ہوئے۔
پاکستان کی جانب سے عباس آفریدی نے 3 کھلاڑیوں کو آؤٹ کیا، اسامہ میر اور افتخار احمد نے بھی ایک ایک وکٹ حاصل کی۔
قومی ٹیم 179 رنز کے ہدف کے تعاقب میں 8 وکٹ پر 174 رنز بناسکی۔
پاکستان کی جانب سے فخر زمان 61 رنز بناکر نمایاں رہے، افتخار احمد 23، صائم ایوب 20 اور عثمان خان نے 16 رنز بنائے۔ عماد وسیم 22 رنز کے ساتھ ناٹ آؤٹ رہے۔
