ٹی ٹوئنٹی ورلڈ کپ کے فائنل میچ دیکھنے کیلیے شائقین کرکٹ کی بڑی تعداد میچ دیکھنے کے لیے کار ریلی کی صورت ایم سی جی پہنچ رہے ہیں۔
آئی سی سی ٹی ٹوئنٹی ورلڈ کپ کا فائنل میچ شروع ہونے میں صرف چند گھنٹے باقی ہے، میلبرن کے کرکٹ گراؤنڈ میں پاکستان اور انگلینڈ ٹرافی کے حصول کے لیے اتریں گے تاہم ان دونوں حریفوں کا مشترکہ حریف بارش بھی ہے جو میچ میں خلل ڈال سکتی ہے۔
اس بڑے میچ کے لیے پاکستانی فینز بے تاب ہیں اور دھڑکنیں تیز ہوگئی ہے، پاکستانی شائقین کرکٹ کی بڑی تعداد یہ میچ دیکھنے اور گراؤنڈ میں قومی ٹیم کو بھرپور سپورٹ کرنے کے لیے کار ریلی کی صورت میں میلبرن کرکٹ گراؤنڈ پہنچ رہی ہے۔
اس موقع پر شائقین کرکٹ کا جوش وخروش دیدنی ہے، انہوں نے پاکستانی پرچم اٹھائے ہوئے ہیں، چہروں پر قومی پرچم کے ہم رنگ پینٹ کرا رکھا ہے، لبوں پر دل دل پاکستان اور ہم جیتیں گے کے نغمے ہیں اور ہاتھوں سے وکٹری کے نشان بنا رہے ہیں۔
پاکستانی شائقین کرکٹ پرامید ہیں کہ 1992 کی تاریخ ایک بار پھر خود کو دہرائے گی اور پاکستان ایک بار پھر میلبرن کرکٹ گراؤنڈ سے فاتح بن کر اور ٹرافی اٹھا کر نکلے گا۔