اسلام آباد: چیئرمین پی ٹی آئی کی فرنٹ پرسن کے طور پر کام کرنے والی فرح گوگی کی کرپشن کی ہوش رُبا داستان سامنے آ گئی۔
تفصیلات کے مطابق چیئرمین پی ٹی آئی کی فرنٹ پرسن فرحت شہزادی کے اثاثوں میں 17-2020 تک 4520 ملین روپے کا حیرت انگیز اضافہ ہوا، فرح گوگی 2020 میں 950 ملین روپے کے اثاثوں کو خود تسلیم کرتی ہیں، جب کہ ان کے غیر ظاہری ملکیتی اثاثے 3825 ملین روپے ہیں۔
ایس ای سی پی ریکارڈ کے مطابق 3 سال میں فرح گوگی کے ظاہری اثاثوں میں 420 فی صد، اور غیر ظاہری اثاثوں میں 15300 فی صد اضافہ ہوا، یہ اثاثے فرح گوگی کی ذاتی ملکیت ہیں جب کہ احسن جمیل و دیگر رشتے داروں کے اثاثے الگ ہیں۔
ایس ای سی پی ریکارڈ کے مطابق فرح گوگی 8 کمپنیوں میں حصے دار ہیں، چیئرمین پی ٹی آئی کی معاونت سے فرح گوگی نے 2018 میں ایمنسٹی اسکیم کا بھی فائدہ اٹھایا، 489 ملین روپے سے زائد کالا دھن پوسٹنگ، ٹرانسفر، سرکاری ٹھیکوں کی مد میں ریگولرائز کرایا گیا۔
فرح گوگی اور ان کے شوہر برطانیہ میں ایک کمپنی میں بطور ڈائریکٹر کام کرتے رہے، یکم فروری 2022 کو یہ کمپنی تحلیل کی گئی، 11 فروری 2022 کو دوسری کمپنی کا قیام عمل میں لایا گیا۔
فرح گوگی کے پاکستان میں موجود بینک اکاؤنٹس کی تعداد میں 2019 سے 2021 تک مسلسل اضافہ دیکھا گیا، 426 ملین روپے کا سرمایہ صرف ایک اکاؤنٹ میں 2018 سے 2022 تک 47 ٹرانزیکشن کے ذریعے آیا۔
فرح گوگی، احسن جمیل گجر اور ان کے پارٹنرز کے ملک بھر میں 102 بینک اکاؤنٹس سامنے آئے ہیں، فرح گوگی کے اثاثوں کی مالیت ساڑھے 14 ارب روپے ہے، یہ اس پیسے کا حصہ ہے جو بطور فرنٹ پرسن لیا گیا۔
