بھارت میں اسپتال انتظامیہ کی ہٹ دھرمی کے باعث غریب باپ بیٹی کی لاش کو موٹر سائیکل پر لے جانے پر مجبور ہوگیا۔
بھارتی میڈیا رپورٹس کے مطابق ریاست مدھیہ پردیش میں اسپتال انتظامیہ نے ایمبولینس دینے سے انکار کیا تو بے بس باپ پیسے نہ ہونے کی وجہ سے پرائیویٹ ایمبولینس کا انتظام نہ کرسکا اور بیٹی کی میت موٹر سائیکل پر گھر لے گیا۔
لکشمن سنگھ نامی شہری نے بتایا کہ اس کی 13 سالہ بیٹی کی موت بیماری کی وجہ سے ہوئی جس کے بعد اس نے اسپتال انتظامیہ سے کہا کہ لاش لے جانے کے لیے گاڑی فراہم کردی جائے۔
لڑکی کے والد نے بتایا کہ اسپتال انتظامیہ نے یہ کہہ کر انکار کردیا کہ ایمبولینس 15 کلومیٹر سے زیادہ دور والے علاقوں کے لیے دستیاب نہیں ہے۔
انہوں نے کہا کہ اسپتال انتظامیہ نے کہا ایمبولینس کا انتظام آپ خود کرلیں، ہمارے پاس پیسے نہ ہونے کی وجہ سے بیٹی کی لاش موٹرسائیکل پر لے جانے کا فیصلہ کیا۔
واقعے کی تفصیلات سامنے آنے کے بعد سوشل میڈیا پر صارفین دکھ اور غصے کا اظہار کر رہے ہیں اور اسپتال انتظامیہ کیخلاف کارروائی کا مطالبہ کررہے ہیں۔
