وزیر داخلہ رانا ثنا اللہ کے دھمکی آمیز بیان پر پی ٹی آئی رہنماؤں نے شدید ردعمل کا اظہار کرتے ہوئے وفاقی وزیر کو آئینہ دکھا دیا ہے۔
پی ٹی آئی رہنما فواد چوہدری نے رانا ثنا اللہ کے بیان پر ردعمل دیتے ہوئے اپنے ٹوئٹ میں کہا ہے کہ رانا ثنا اللہ وہ پُتلا ہیں جو کھیت میں پرندے بھگانے کیلئے لگایا جاتا ہے اور اسے کھیت میں کھڑا رہنے کے لیے بھی کسی اور کا سہارا چاہیے ہوتا ہے، رانا جی کی زبان بھی اس سہارے کی وجہ سے ہی چل رہی ہے۔
رانا ثنااللہ ایک (Scarecrow) ہے، جِسے فصل کو پرندوں سے بچانے کے لیئے استعمال کیا جا رہا ہے، اُسے کھیت میں کھڑا کرنے کے لیئے جو ڈنڈا دیا جاتا ہے، وہ ڈنڈا کسی اور کا ہے اور یہ رانا جی کی زُبان اُس ڈنڈے کی وجہ سے چل رہی ہے https://t.co/EC4nCDVEHj
— Ch Fawad Hussain (@fawadchaudhry) July 12, 2022
فواد چوہدری نے مزید کہا کہ ویسے منافقت رانا ثنا اللہ پر ختم ہے، اس شخص نے ایک احتجاج پر ملک بند کراکر بچوں اور عورتوں پر تشدد کرایا، نوجوانوں پر لاٹھی چارج اور آنسو گیس کے حملے کرائے اور پھر فخر سے کہا آنسو گیس کا نیا اسٹاک منگوایا ہے۔
پی ٹی آئی رہنما نے کہا کہ اس کے منہ سے آرٹیکل 15 کا ذکر ایسا ہے جیسے مودی مذہبی آزادی پر لیکچر دے، آپ جرات کرکے فیصل آباد بازار میں جائیں، جن القابات سے فیصل آباد کے لوگ آپ کو پکارتے ہیں، لگتا ہے کہ سارے فیصل آباد کے شناختی کارڈ اور پاسپورٹ بلاک کرنے پڑیں گے۔
آپ جرآت کر کے فیصل آباد بازار میں جائیں سارے فیصل آباد کے شناختی کارڈ اور پاسپورٹ بلاک کرنے پڑیں گے جن القابات سے فیصل آباد کے لوگ آپ کو پکارتے ہیں۔۔۔۔ https://t.co/lPSfp515zg
— Ch Fawad Hussain (@fawadchaudhry) July 12, 2022
دوسری جانب ڈاکٹر شہباز گل نے رانا ثنا اللہ کے دھمکی آمیز ٹوئٹ پر کہا ہے کہ رانا ثنا اللہ آپ کی یہ ٹوئٹ پڑھ کر ہنسی نکل گئی، اتنا ڈر گئے ہیں آپ کہ لوگوں کو جعلی دھمکیاں دینا شروع ہوگئے ہیں، آپ کو چور کہنے پر کوئی مقدمہ نہیں بن سکتا ہے۔
شہباز گل نے مزید کہا کہ اگر آپ نے ایسی کوئی مہم جوئی کی تو آپ کو عدالت لیکر جائیں گے، آپ جو بھی دھمکی دیں لوگوں نے آپ کو چور چور ہی کہنا ہے، آپ ہیلمٹ پہن لیں۔
لگتا ہے رانا صاحب نے کسی تھکڑ قسم کے پنجابی فلم رائیٹر کو اپنے ٹوئیٹ لکھنے پر رکھ لیا ہے۔ رانا صاحب کہنا چاہ رہے ہیں کہ اگر ان کو کسی نے چور کہا تو یہ مقدمہ قائم کریں گے۔ان سے کوئی پوچھے کہ آپ وزیرِداخلہ ہیں یا کوئی گلی کی نکڑ پر کھڑا رنگ باز جو آنے جانے والے کو تڑیاں لگا رہا ہے https://t.co/a1byhTMG4g
— Dr. Shahbaz GiLL (@SHABAZGIL) July 12, 2022
واضح رہے کہ اس سے قبل وفاقی وزیر داخلہ نے سماجی رابطوں کی ویب سائٹ ٹوئٹر پر دھمکی آمیز ٹوئٹ کرتے ہوئے کہا تھا کہ بھرپور کارروائی، اندراج مقدمہ، گرفتاری حتیٰ کہ شناختی کارڈ اور پاسپورٹ تک بلاک کیا جاسکتا ہے تاکہ شہریوں کو آئین پاکستان کے آرٹیکل 15 میں دیے گئے "نقل وحمل” کی آزادی کے حق کا تحفظ یقینی بنایا جاسکے۔
بھرپور کاروائی، اندراج مقدمہ، گرفتاری حتیٰ کہ شناختی کارڈ اور پاسپورٹ کی Blockage عمل میں لائی جائیگی تاکہ شہریوں کے آئین پاکستان کے آرٹیکل 15 میں دئیے گئے ”Freedom of Movement“ کے حق کاتحفظ یقینی بنایا جاسکے۔
(4/5)— Rana SanaUllah Khan (@RanaSanaullahPK) July 12, 2022
یاد رہے کہ گزشتہ دنوں ن لیگ کے وفاقی وزیر احسن اقبال کو برگر کھانا مہنگا پڑگیا تھا اور ایک فیملی نے انہیں دیکھ کر چور چور کے نعرے لگا دیے تھے بعد ازاں اس فیملی نے احسن اقبال سے معذرت کرلی تھی جس کے بارے میں شہباز گل نے دعویٰ کیا تھا کہ فیملی کو ڈرا دھمکا کر معافی منگوائی گئی ہے۔
