پی ٹی آئی رہنما فواد چوہدری نے سابق صدر آصف زرداری کے بیان پر ردعمل دیتے ہوئے کہا ہے کہ سب سے زیادہ صحافی اندرون سندھ میں قتل ہوئے۔
پاکستان تحریک انصاف کے رہنما اور سابق وفاقی وزیر فواد چوہدری نے سماجی رابطوں کی ویب سائٹ ٹوئٹر پر سابق صدر آصف علی زرداری کے بیان پر ردعمل دیا ہے۔
فواد چوہدری نے اپنے ٹوئٹ میں کہا ہے کہ سب سے زیادہ صحافی اندرون سندھ میں قتل ہوئے اور آپ کے اقتدار کی برکتوں سے صحافیوں کی زندگی اجیرن ہے۔
پی ٹی آئی رہنما نے مزید لکھا ہے کہ مالکان اور اینکرز کو خرید لینا صحافیوں کے حقوق نہیں ہوتے۔
سب سے زیادہ صحافی اندرون سندہ قتل ہوئے، آپ کے اقتدار کی برکتوں سے صحافیوں کی زندگی اجیرن ہے صرف مالکان اور اینکرز کو خرید لینا صحافیوں کے حقوق نہیں ہوتے https://t.co/6t1PGdE9hz
— Ch Fawad Hussain (@fawadchaudhry) July 16, 2022
واضح رہے کہ سابق صدر آصف علی زرداری نے کراچی میں صوبائی وزرا سے ملاقات کے دوران گفتگو کرتے ہوئے کہا تھا کہ عمران خان کا دور آزادی صحافت کے حوالے سے سیاہ دور رہا۔
یہ بھی پڑھیں: عمران خان کا دور آزادی صحافت کے حوالے سے سیاہ دور رہا، آصف زرداری
آصف زرداری نے مزید کہا تھا کہ پیپلز پارٹی دور میں ہمیشہ صحافیوں کو آزادی ملی ہے اور ملتی رہے گی، کاش عمران خان کو اپنے دور میں صحافیوں کے حقوق کا خیال آجاتا، ان کا دور آزادی صحافت کے حوالے سے سیاہ دور رہا ہے۔