اسلام آباد: وفاقی وزیر ماحولیاتی تبدیلی شیری رحمٰن نے کہا کہ جن کے خلاف ریڈ وارنٹ جاری ہونے چاہیے تھے انہوں نے وائٹ پیپر جاری کیا ہے۔
سینیٹر و وفاقی وزیر ماحولیاتی تبدیلی شیری رحمٰن نے کہا کہ پی ٹی آئی نے موجودہ حکومت کی 8 ماہ کی کارکردگی پر وائٹ پیپر جاری کیا ہے، جن کے خلاف ریڈ وارنٹ جاری ہونے چاہیے تھے انہوں نے وائٹ پیپر جاری کیا ہے۔
شیری رحمان کا کہنا تھا کہ یہ وہ لوگ ہیں جو اپنے 4 سال کے بدترین دور اقتدار کا حساب دینے کو تیار نہیں ہے، یہ وہ لوگ ہیں جو 4 سال ملک پر مسلط رہنے کہ بعد کہتے ہیں ہمارے پاس کوئی اختیار نہیں تھا۔
تحریک انصاف نے موجودہ حکومت کی 8 ماہ کی کارکردگی پر وائیٹ پیپر جاری کیا ہے۔ ملکی معیشت تباہ کرنے کی جرم میں جن کے خلاف ریڈ وارنٹ جاری ہونے چاہیے تھے انہوں نے حکومت کے خلاف وائیٹ پیپر جاری کیا ہے۔ یہ وہ لوگ ہیں جو اپنے چار سالے کے بدترین دور اقتدار کا حساب دینے کو تیار نہیں۔ 1/3
— SenatorSherryRehman (@sherryrehman) January 4, 2023
وفاقی وزیر نے پی ٹی آئی سے سوال کیا کہ ملک کو مفلوج اور حکومت کو مقروض کرنے والے کس منہ سے وائٹ پیپر جاری کر رہےہیں؟۔
سینیٹر شیری رحمان کا کہنا تھا کہ جس نہج پر پی ٹی آئی نے ملک کو پہنچایا تھا وہاں سے نکلنے میں 8 ماہ نہیں کئی سال لگ جائیں گے۔
شیری رحمان کا مزید کہنا تھا کہ کروڑ نوکریاں اور 50 لاکھ گھر کس کو ملے؟، قرضہ نہیں لونگا والوں نے ملکی قرضاجات میں 70 فیصد اضافہ کیوں کیا؟ کرپشن کا بیانیہ بنانے والے خود کرپشن میں نااہل کیوں ہوئے؟۔
